21 лістапада ў салезіянскім араторыі ў Смаргоні пры парафіі святога Міхала Арханёла наладзілі свята для дзяцей з нагоды ўрачыстасці Хрыста Валадара Сусвету.
На святой Імшы кс. Казімір Мурава SDB разважаў у гаміліі пра будаўніцтва Божага валадарства сярод нас ужо на зямлі, у сем’ях, там, дзе мы знаходзімся. Асаблівым чынам ён звярнуў увагу на важнасць таго, каб жыць у праўдзе і служыць адзін аднаму праз паўсядзённыя дробныя рэчы.
Пасля распачалася забаўляльная частка свята. Дзеці здзяйснялі вандроўку ў “валадарствы” сілы, цудаў, кемлівасці, весялосці, хуткасці, сюрпрызаў, уважлівасці, каб дайсці да сапраўднага Божага валадарства. Іх сустракалі розныя казачныя героі.
Асаблівую зацікаўленасць выклікала ў дзяцей валадарства цудаў, якое падрыхтавала Ірына Клявец ASC, дзе яны маглі пабачыць цікавыя водныя вопыты і паспрабаваць паўдзельнічаць у іх самі.
Таксама дзеці з нецярплівасцю чакалі валадарства сюрпрызаў, дзе маглі атрымаць невялічкія сюрпрызы.
На заканчэння свята дзеці змаглі ўвайсці ў Божае валадарства і пачуць слоўка, падчас якога Дзяніс Акуліч ASC падкрэсліў, што ў Валадарстве Бога пануе любоў і праўда. Як адзначыў ён, каб увайсці ў гэтае валадарства, трэба кожны дзень задаваць сабе пытанне: “Што я сёння зрабіў, каб увайсці ў Валадарства Божае?”
Свята скончылася агульнай малітвай.
С. Валянціна Кот FMA