1 лістапада, ва ўрачыстасць Усіх Святых, арцыбіскуп Тадэвуш Кандрусевіч, Мітрапаліт Мінска-Магілёўскі на пенсіі, цэлебраваў святую Імшу на парафіяльных могілках у яго родным Адэльску, дзе пахаваны яго бацькі, сястра і блізкія.
У гэты вечар на могілках традыцыйна сабралася вялікая колькасць людзей, каб памаліцца ў інтэнцыі сваіх памерлых.
У гаміліі іерарх нагадаў, што ўрачыстасць Усіх Святых уводзіць нас ва ўспамін усіх памерлых вернікаў. Ён адзначыў, што памерлыя не могуць дапамагчы сабе, іх час завяршыўся, яны аддадзены на нашую ласку і толькі мы, жывыя, можам дапамагчы ім перайсці з чыстца ў неба. Арцыбіскуп дадаў, што Бог укладае ў нашы рукі ключ, якім мы можам адчыніць ім дзверы вечнага шчасця, дастаткова толькі ўставіць яго ў замок і павярнуць, для чаго неабходна выкарыстаць магчымасць атрымаць поўны адпуст і ахвяраваць яго ў інтэнцыі памерлага.
У той жа дзень апоўдні арцыбіскуп узначаліў Імшу ў гродзенскім катэдральным касцёле св. Францішка Ксаверыя. У гаміліі ён нагадаў пра пакліканне ўсіх да святасці. “Святасць – гэта не прывілея таго ці іншага чалавека, а Божая ўзнагарода за згоднае з Божым законам жыццё, бо ніхто не нараджаецца святым, але ім становіцца, пераадольваючы розныя складанасці і спакусы”, – адзначыў іерарх.
Арцыбіскуп заклікаў следаваць у змаганнях за святасць у сучасным дэсакралізаваным свеце думцы св. Аўгустына: “Калі іншыя маглі стаць святымі, то чаму і мы не можам?”
Прэс-служба Гродзенскай дыяцэзіі