З 18 па 21 чэрвеня адбыўся духоўна-культурны адпачынак для дзяўчат, які арганізавалі сёстры салезіянкі ў Стоўбцах пры парафіі святога Казіміра.
На адпачынку сабраліся дзяўчаты былі з розных месцаў: Смаргоні, Бараўлянаў, Залесся, Стоўбцаў.
У межах кароткага адпачынку дзяўчаты мелі магчымасць паразважаць над сапраўдным скарбам свайго жыцця і тым, што часам перашкаджае мець гэты скарб: нашыя паўсядзённыя клопаты і праблемы, прапановы сучаснага свету.
Таксама ў іх была магчымасць кожны дзень удзельнічаць у святой Імшы. У адной з гамілій кс. канонік Ігар Лашук нагадаў удзельніцам пра дзве запаведзі любові і падкрэсліў, што без веры няма сапраўднай любові і наадварот, што кожная з іх павінна імкнуцца ўзрастаць у веры і любові не павярхоўна, але глыбока ў сэрцы і праз канкрэтныя ўчынкі ў сваім жыцці.
Акрамя таго, дзяўчаты змаглі пабываць у касцёле святых апосталаў Пятра і Паўла ў в. Новы Свержань, памаліцца і папрасіць патрэбныя ласкі для сябе і сваіх блізкіх.
За гэты кароткі час дзяўчаты імкнуліся больш пазнаць сябе саміх, пазнаёміцца адна з адной, а таксама навучыцца чамусьці новаму, што спатрэбіцца ў іх жыцці.
На заканчэнне адпачынку сёстры салезіянкі пажадалі дзяўчатам перажываць кожны дзень з Богам, як гэта чыніла благаслаўлёная Лаўра Вікунья, якая была ў іх узросце і ахвяравала жыццё для збаўлення сваёй маці. Кожная з дзяўчат атрымала медалік і абразік благаслаўлёнай, каб праз яе заступніцтва маліцца за сябе, мець сапраўдны ідэал свайго жыцця і быць шчаслівай на зямлі і ў небе.
С. Валянціна Кот FMA