Да Першай Камуніі прыступілі дзеці ў гродзенскім францішканскім касцёле

16 мая ў гродзенскай парафіі Маці Божай Анёльскай група дзяцей упершыню прыступіла да святой Камуніі.

У гэты радасны і важны дзень дзеці прыйшлі ў францішканскі касцёл у белых адзеннях, ахопленыя тым, што павінна адбыцца, усхваляваныя, але радасныя.

Днём раней яны ўпершыню сустрэліся з Хрыстом, які прабачае, у сакрамэнце пакання – і амаль святыя. Цяпер яны прыйшлі, каб прыняць Езуса, які прыходзіць у постаці хлеба.

Дзеці доўгі час рыхтаваліся, каб як мага лепш перажыць гэтую выключную хвіліну. Спачатку яны знаёміліся з Богам, пра якога ім распавядалі бацькі, дзядулі і бабулі. На ўроках рэлігіі яны пашыралі свае веды па гісторыі збаўлення і пазнавалі праўды веры.

Сёння яны свядома прымалі Бога ў свае сэрцы. Можна смела сказаць, што гэта толькі пачатак цудоўнага падарожжа з Езусам, якога варта паставіць у цэнтр свайго жыцця, каб Ён стаў найвялікшым і найважнейшым скарбам для іх назаўсёды.

Кс. Юрый Марціновіч

Фота: Баляслаў Гавецкі