12 мая біскуп Гродзенскі Аляксандр Кашкевіч наведаў парафіяльную супольнасць св. Тэрэзы Авільскай у Шчучыне.
Падчас святой Імшы іерарх удзяліў сакрамэнт канфірмацыі моладзі гэтай парафіі, a таксама моладзі парафіі св. Станіслава, біскупа і мучаніка, у Ляцку.
У гаміліі біскуп казаў пра адкрыццё на дзеянне Духа Святога, бо без Яго, па словах іерарха, “нам было б вельмі цяжка верыць, маліцца, трываць у праўдзе, справядлівасці і любові, пераадольваць цяжкасці, змагацца з уласнымі грахамі, выконваць добрыя ўчынкі, узрастаць у любові да Бога і да бліжняга”.
Пастыр Касцёла на Гродзеншчыне падкрэсліў, што “Святы Дух разагравае нашыя сэрцы, чыніць іх чуйнымі на Божую любоў і здольнымі адорваць цяплом любові ўсіх тых, хто побач з намі”.
Біскуп заклікаў моладзь, якая атрымала ў гэты дзень сем дароў Духа Святога ў сакрамэнце хрысціянскай сталасці, быць для свету жывым Евангеллем і паказваць іншым шлях да Бога сваім прыкладам.
На заканчэнне Імшы тыя, хто прыняў сакрамэнт, выказалі падзяку біскупу, святарам, дыякану, якія рыхтавалі іх падчас урокаў катэхезы. Таксама яны запэўнілі, што жадаюць і далей падтрымліваць дух святой веры, заўсёды жывучы з Богам і будучы Яго вернымі дзецьмі.
Пробашч парафіі а. Андрэй Агель SP падзякаваў усім за ўдзел у супольнай малітве, а сваім маладым парафіянам пажадаў ніколі не пакідаць Бога і не выракацца веры.
Кс. Юрый Марціновіч