У касцёле св. Арханёла Міхала ў Навагрудку сярод дэкарацый, падрыхтаваных да Вялікадня, будуць змешчаны творы вядомага мастака-манументаліста Сяргея Грыневіча, прысвечаныя Муцы Езуса Хрыста.
Сярод гэтых твораў трыптых Укрыжавання і П’ета ў некалькіх выданнях, якія гарманічна дапаўняюць атмасферу Пасхальнага Трыдууму. Працы яскрава перадаюць боль і пакуты Хрыста, з’яўляюцца нібы працягам – з іншага, незвычайнага ракурсу – роздуму вялікіх мастакоў на тэму Ахвяры, прынесенай Езусам.
Дэкарацыі, прысвечаныя муцы і смерці Збаўцы – перш за ўсё імправізаваную цямніцу і магілу Езуса, – робяць кожны год да Вялікадня ва ўсіх беларускіх касцёлах.
Такія дэкарацыі дапамагаюць задумацца над цаной, якую заплаціў Хрыстус дзеля збаўлення людзей.
Манументальны жывапіс, прысвечаны Мукам Хрыстовым, – гэта маштабныя творы рэлігійнага мастацтва, створаныя для святыняў або іншых сакральных прастораў, каб перадаць ключавыя эпізоды апошніх дзён зямнога жыцця Езуса. Гэтыя работы, якія ўключаюць сцэны з Апошняй Вячэры да Укрыжавання і Уваскрасення, маюць свае асаблівасці. Асноўная ўвага надаецца евангельскім падзеям Вялікага тыдня: арышту Хрыста, бічаванню, нясенню крыжа, укрыжаванню, зняццю з крыжа, аплакванню і пахаванню. Найчасцей яны датычаць сцэн, якія падкрэсліваюць пакуты і ахвярнасць Хрыста, – напрыклад, “Ecce Homo” або “П’ета”.
Такі жывапіс імкнецца выклікаць глыбокія пачуцці – спачуванне, пашану, пакаянне. Мастакі выкарыстоўваюць драматычныя кампазіцыі, экспрэсіўныя жэсты, кантрасты святла і ценю (асабліва ў барока), каб узмацніць эмацыянальны ўплыў. Творы насычаны сімваламі: крыжа як знаку адкуплення, цярновага вянка як эмблемы пакутаў, крыві Хрыста як вобразу ачышчэння грахоў. Кампазіцыі часта адлюстроўваюць тэалагічныя ідэі, падкрэсліваючы ахвярнасць, чалавечую і боскую прыроду Хрыста.
Акрамя эстэтычнай ролі, манументальны хрысціянскі жывапіс кладзе націск на ролю дыдактычную, тлумачачы евангельскія падзеі, і літургічную, дапамагаючы засяродзіцца на малітве і разважаннях над ахвярай Хрыста.
Сяргей Аркадзьевіч Грыневіч нарадзіўся ў пасёлку Краснасельскі Гродзенскай вобласці. У 1978 г. скончыў Рэспубліканскую школу-інтэрнат па музыцы і выяўленчым мастацтве, у 1983 г. – Беларускую дзяржаўную акадэмію мастацтваў (аддзяленне манументальнага жывапісу). Працуе з Фрыдрыхам Кістэрсам – мастацтвазнаўцам, крытыкам, спадчыннікам калекцыі старажытнага класічнага мастацтва свайго бацькі Гайнца Кістэрса. Жыве ў Гродне, мае тры майстэрні: у Гродне, у загарадным доме і ў Швейцарыі.
Выставы яго твораў адбываліся ў Беларусі, Расіі, Іспаніі, Польшчы, Літве, ЗША, Швейцарыі, Францыі, Нідэрландах, Украіне, Латвіі. Удзельнік некалькіх мастацкіх пленэраў у Навагрудку.
Манументальнае мастацтва Сяргея Грыневіча адзначаецца дынамізмам, пластычнасцю і глыбінёй задумы, пра што сведчаць яго працы на хрысціянскую тэматыку, якія знаходзяцца ў навагрудскім касцёле Арханёла Міхала.
