З 22 па 28 ліпеня ў Івянцы (Мінска-Магілёўская архідыяцэзія) традыцыйна пройдзе “Музычная майстэрня” – імпрэза для музыкаў, якія жадаюць праславіць Бога праз свае таленты.
Сёлета “Музычная майстэрня” будзе юбілейнай – адбудзецца ў 20-ы раз – і пройдзе пад дэвізам “На пачатку было Слова…”.
Удзельнікі атрымаюць магчымасць наведаць майстар-класы па ігры на розных музычных інструментах, тэатральным мастацтве, сцэнаграфіі, а таксама далучыцца да шматасабовага хору, які штодзённа ўпрыгожвае святую Імшу літургічнымі спевамі. Важнай часткай насычанай праграмы “Музычнай майстэрні” з’яўляюцца канферэнцыі і супольныя вечары, на якіх удзельнікі змогуць паказаць свае таленты і бліжэй пазнаёміцца.
Арганізатары нагадваюць, што “Музычная майстэрня” – перш за ўсё інтэнсіўная праца і выдатная магчымасць праславіць Бога праз гучны супольны спеў, таму звяртаюць увагу на важнасць актыўнага ўдзелу ў малітве і рэпетыцыях.
Досвед супольнага спеву вітаецца, але не з’яўляецца абавязковым.
Узрост удзельнікаў – ад 14 гадоў (непаўналетнім патрэбны пісьмовы дазвол ад бацькоў і паўналетні апякун).
Кошт удзелу – 50 рублёў.
Па магчымасці будзе арганізаваны начлег у парафіян, але ўдзельнікам неабходна мець з сабой спальнік, турыстычны дыванок і намёт.
Прадугледжаны гарачае харчаванне на працягу дня і душ.
Рэгістрацыя перад прыбыццём абавязковая. Форма для рэгістрацыі.
