18 кастрычніка ў гродзенскай катэдры св. Францішка Ксаверыя адбудзецца тэлемост, з дапамогай якога можна будзе далучыцца да сусветнай малітоўнай акцыі “Мільён дзяцей моліцца Ружанец”.
Пачатак у 18.00.
Мэта гэтай акцыі – папулярызаваць ружанцовую малітву сярод дзяцей і іх бацькоў, аб’яднаць свет перад абліччам сённяшніх праблем і крызісаў. У мінулым годзе яна сабрала рэкордную колькасць удзельнікаў: больш за паўмільёна дзяцей са 136 краін, у тым ліку з Беларусі. Сёлета Беларусь таксама далучыцца да акцыі.
У бягучым годзе арганізатары сусветнай малітоўнай кампаніі запрашаюць дзяцей паразважаць над біблейскім урыўкам, у якім св. Юзаф атрымлівае ў сне перасцярогу ад анёла і неадкладна адпраўляецца ў Егіпет (пар. Мц 2, 13). Менавіта дзякуючы Божаму пасланніку ён хутка прыняў меры і змог абараніць жыццё Немаўляці Езуса.
План ружанцовай малітвы ў Беларусі:
Хвалебныя таямніцы:
1. “Змёртвыхпаўстанне Хрыста” – Мінск, Мінска-Магілёўская архідыяцэзія
2. “Унебаўшэсце Хрыста” – Магілёў, Мінска-Магілёўская архідыяцэзія
3. “Спасланне Святога Духа” – Браслаў, Віцебская дыяцэзія
4. “Унебаўзяцце Найсвяцейшай Панны Марыі” – Гомель, Пінская дыяцэзія
5. “Укаранаванне Найсвяцейшай Панны Марыі” – Гродна, Гродзенская дыяцэзія
