14 чэрвеня, у нядзелю Усіх святых беларускага народу, вернікі грэка-каталіцкай парафіі Маці Божай Фацімскай у Гродне традыцыйна ўшанавалі памяць благаслаўлёнай Мар’яны Бярнацкай.
12 чэрвеня адзначаецца літургічны ўспамін благаслаўлёнай Мар’яны Бярнацкай, якая была забіта падчас Другой сусветнай вайны разам з іншымі жыхарамі Гродна і Ліпска на Фартах у Навумавічах.
У гэты дзень на месцы яе смяротнага пакарання, Форце №2, пройдзе адпустовая святая Імша гродзенскай парафіі, якая была заснавана ў нядаўні час і абрала сваёй апякункай благаслаўлёную Мар’яну.
Пачатак Імшы ў 12 гадзін, яе ўзначаліць біскуп Гродзенскі Аляксандр Кашкевіч.
Да ўдзелу ў Эўхарыстыі запрашае ўсіх жадаючых пробашч парафіі бл. Мар’яны Бярнацкай у Гродне кс. Юрый Марціновіч разам са сваімі парафіянамі.
“Давайце разам даручым Богу праз заступніцтва благаслаўлёнай Мар’яны свае інтэнцыі і просьбы і будзем углядацца ў прыклад яе жыцця, каб будаваць супольнасці, заснаваныя на даверы, любові і ўзаемнай павазе”, – заахвочвае пробашч парафіі.
18 ліпеня вернікі Гродна і ваколіц, у першую чаргу маладыя людзі, у індывідуальным парадку вырашылі ўшанаваць памяць усіх жыхароў Гродна і Ліпска, якія загінулі падчас Другой сусветнай вайны.
15 ліпеня на фартах у Навумавічах каля Гродна адбыліся ўрачыстасці, прысвечаныя 80-й гадавіне мучаніцкай смерці благаслаўлёнай Мар'яны Бярнацкай і іншых мучанікаў Другой сусветнай вайны.
У гэтым месцы з 13 па 16 ліпеня 1943 г. былі расстраляны гітлераўцамі больш за 3 тысячы чалавек, сярод якіх інтэлігенцыя, дзяржаўныя і грамадскія дзеячы, духоўныя асобы, у тым ліку капелан сясцёр назарэтанак і прэфект школ кс. Юстын Скакоўскі, вікарый гродзенскай фарнай парафіі кс. Казімір Шыпіла, гвардыян гродзенскага францішканскага кляштара а. Дыянізій Клімчак.
Благаслаўлёная Мар’яна Бярнацкая, якая паходзіла з Ліпска над ракой Бебжай (сёння Польшча), аддала жыццё за цяжарную нявестку і яе будучае дзіця. Мар’яну расстралялі разам з сынам сярод 48 жыхароў Ліпска і Гродна.
У лесе, які бачыў падзеі Другой сусветнай вайны і захоўвае праўду аб тых трагічных хвілінах, у межах урачыстасцяў адбылася святая Імша, якую ўзначаліў біскуп Гродзенскі Аляксандр Кашкевіч.
У пачатку Эўхарыстыі іерарх папрасіў усіх шматлікіх удзельнікаў, якія прыбылі пешкі і на транспарце, будаваць мір – найперш у сваіх сем’ях, а таксама заклікаў да асаблівай малітвы ў інтэнцыі краін, якія закрануты ваеннымі канфліктамі і дзе праліваецца кроў нявінных людзей.
Успамінаючы бл. Мар’яну, біскуп падкрэсліў гераізм гэтай незвычайнай жанчыны, якая дае сучасным людзям прыклад цудоўнай любові і павагі да бліжняга. Ён заахвоціў прасіць яе дапамогі ва ўтварэнні здаровых і трывалых адносін паміж пакаленнямі, а таксама паміж народамі Беларусі і краін, з якімі яна мяжуе.
Ксёндз канонік Юрый Марціновіч, пробашч парафіі бл. Мар’яны Бярнацкай у Гродне, якая ў знак удзячнасці гэтай благаслаўлёнай за яе гераічны ўчынак будуе першы ў свеце касцёл, прысвечаны ёй, у гаміліі выказаў думку, што гэты лес павінен стаць для прысутных месцам разважання над сваім жыццём.
Святар падкрэсліў, што наведваць гэтае месца трэба не для таго, каб узрушыцца ці заплакаць над лёсам бл. Мар’яны і іншых мучанікаў, а для таго, “каб вучыцца ад іх любові на практыцы і прасіць іх быць для нас настаўнікамі любові – любові ў нашых сем’ях, супольнасцях”.
На Эўхарыстыі ўдзельнікі маліліся за сваю краіну, каб у ёй панаваў жаданы мір, і за ўсе сем’і, каб яны на ўзор благаслаўлёнай Мар’яны былі здольныя на ўзаемнае служэнне, самапрысвячэнне і ахвяру.
Акрамя таго, маліліся аб міры ва ўсім свеце і ў кожнай сям’і, аб шчаслівым будаўніцтве касцёла бл. Мар’яны Бярнацкай у гродзенскім мікрараёне Баранавічы і за ўсіх, хто малітвай, працай і ахвяраваннямі дапамагае парафіяльнай супольнасці, якая з ліпеня мінулага года будуе гэты касцёл.
Прысутныя таксама падтрымалі ахвяраваннямі будаўніцтва святыні, за што вернікі маладой парафіі вельмі ўдзячныя і будуць аддаваць доўг сваёй удзячнасці малітвай.
Прэс-служба Гродзенскай дыяцэзіі
Фота: Міхаіл Міклашэвіч
15 ліпеня адбылася пешая пілігрымка з Гродна на месца спачыну ахвяр Другой сусветнай вайны, якое знаходзіцца ў лесе каля Навумавічаў. Сярод мноства жыхароў Гродна і Ліпска, якія былі расстраляны падчас вайны і пахаваны ў гэтым месцы, была і благаслаўлёная Мар’яна Бярнацкая.
Сёлета адзначаецца 80-я гадавіна гэтай страшнай трагедыі, калі было расстраляна, магчыма, больш за 3 тысячы чалавек, сярод якіх інтэлігенцыя, дзяржаўныя і грамадскія дзеячы, духоўныя асобы.
Пілігрымка шляхам мучанікаў нашай зямлі вырушыла з гродзенскага касцёла Маці Божай Анёльскай (францішканскі). У пілігрымцы яе ўдзельнікі, прадстаўнікі розных пакаленняў, углядаліся ў прыклад веры тых, хто застаўся да канца адданы Хрысту і Яго Евангеллю.
Асаблівая ўвага сёлета звярталася пілігрымамі на прыклад, які пакінула бл. Мар’яна – простая жанчына, маці, жонка, бабуля, свякроў, хрысціянка, а найперш чалавек.
Ксёндз канонік Антоні Грэмза разам з моладдзю ўзначаліў разважанні аб жыцці благаслаўлёнай, у гонар якой у Гродне будуецца каталіцкая святыня.
Кожны пілігрым ішоў у гэтае асаблівае на карце нашай краіны месца, палітае мучаніцкай крывёю, з уласнай інтэнцыяй. Акрамя таго, у іх была агульная інтэнцыя: яны маліліся аб міры для ўсяго свету, асабліва ахопліваючы малітвай краіны, якія закрануты ваеннымі канфліктамі і дзе праліваецца кроў нявінных людзей.
Дасягнуўшы Навумавіцкага лесу, які 80 гадоў таму стаў нямым сведкам трагічных падзей, пілігрымы доўга стаялі ў маўчанні, углядаючыся ў крыж, які ўздымаецца на гары. Яны дзякавалі Богу за час гэтай вандроўкі і за сведчанне веры столькіх мучанікаў, якія і сённяшніх людзей просяць аб адвазе – адвазе ў штодзённым жыцці, дома, на працы, на вучобе і ва ўсіх іншых месцах, куды іх пашле Божы Провід.
Прэс-служба Гродзенскай дыяцэзіі
Фота: Міхаіл Міклашэвіч