16 снежня ў касцёле Найсвяцейшага Сэрца Пана Езуса i св. Язафата ў Заневічах (дэканат Вялікая Бераставіца) адбылася святая Імша ў інтэнцыі спачылага ксяндза прэлата Ежы Стэцкевіча. Спачылы быў звязаны з гэтай парафіяльнай супольнасцю, якую вельмі часта наведваў.
Імша распачалася ў тую ж самую гадзіну, што і ў Калінінградзе, дзе адбылося пахаванне памерлага святара.
Эўхарыстыю ўзначаліў пробашч парафіі кс. Юрый Ясевіч. На малітву прыбылі таксама законныя сёстры, парафіяне і родныя ксяндза прэлата. Падчас Імшы ўдзельнікі супольна маліліся аб радасці вечнага жыцця для спачылага.
Ксёндз прэлат Ежы Стэцкевіч нарадзіўся 1 кастрычніка 1954 г. у Гродне. Ва ўзросце двух гадоў выехаў з бацькамі ў Польшчу ў Заходнія Паморы. У 1975 г. паступіў у Вышэйшую духоўную семінарыю ў Шчэціне.
Прэзбітэрскае пасвячэнне атрымаў 12 красавіка 1981 г. Быў між іншым дырэктарам дыяцэзіяльнага выдавецтва, дыяцэзіяльнай друкарні і рэдактарам газеты.
З чэрвеня 1991 г. працаваў у Калінінградзе. Заснаваў першую ў Расіі каталіцкую рускамоўную газету “Калининградский католический вестник”.
У 1996 г. Папа Ян Павел ІІ надаў яму тытул капелана Яго Святасці, а Папа Бэнэдыкт XVI у 2013 г. – годнасць ганаровага прэлата Яго Святасці.
Ксёндз Ежы Стэцкевіч будаваў сакральныя аб’екты ў Калініградзе, быў першым дэканам Каталіцкага Касцёла ў Калінінградскай вобласці, а таксама біскупскім вікарыем.
Ксёндз прэлат вельмі шанаваў благаслаўлёную Цэліну Бажэнцкую. У Абрэмшчынe каля Заневіч на месцы былога маёнтка Цэліны i Юзафа Бажэнцкiх дзякуючы старанням ксяндза Ежы Стэцкевіча і яго брата, таксама святара, ксяндза прэлата Андрэя Стэцкевіча была пабудавана невялікая капліца ў гонар бл. Цэліны. У будоўлю быў укладзены сімвалічны камень з былога маёнтка Бажэнцкіх.
У канцы верасня гэтага года кс. прэлат Ежы Стэцкевіч праводзіў у Вышэйшай духоўнай семінарыі ў Гродне рэкалекцыі для святароў, якія служаць на тэрыторыі Гродзенскай дыяцэзіі.
Адышоў у вечнасць 13 снежня ў Калінінградзе, дзе быў пахаваны пры касцёле святога Адальбэрта.
Кс. Юрый Марціновіч