Рэкалекцыі для жанчын прайшлі ў кляштары назарэтанак у Навагрудку

06 Жніўня 2020

nazaret 26 З 31 ліпеня па 2 жніўня ў кляштары Kангрэгацыi Сясцёр Найсвяцейшай Сям’і з Назарэта ў Навагрудку адбыліся рэкалекцыі для жанчын. На духоўныя практыкаванні прыбылі да назарэтанак 23 удзельніцы з розных месцаў Беларусі.

Сустрэча пачалася ўдзелам у святой Імшы ў Батароўскім лесе каля Навагрудка, дзе 77 гадоў таму былі расстраляны адзінаццаць сясцёр назарэтанак.

Затым у праграме былі святыя Імшы, начная адарацыя, канферэнцыі, разважанні над Божым словам, маўчанне. З канферэнцыямі для жанчын выступілі пробашч парафіі св. Юзафа Рамесніка і бл. сясцёр мучаніц з Навагрудка ў Лідзе кс. Віталій Сідорка і адказная за сем’і Асацыяцыі Святой Сям’і пры Кангрэгацыі сясцёр назарэтанак с. Марыяна Алешчык CSFN.

У гэтыя дні ўдзельнікі разважалі пра разважнасць, справядлівасць, мужнасць, устрыманасць і пра цноты, якія дорыць Пан пры нараджэнні, – веру, надзею, любоў.

Прысутныя аднадушна прыйшлі да высновы, што аб’ядноўвае ўсе цноты імкненне чыніць дабро і што ўсе цноты, у тым ліку падораныя Богам, чалавек павінен у сабе развіваць, каб жыць, любіць і быць шчаслівым.

Жанчыны ўдзячныя сёстрам назарэтанкам за арганізацыю гэтых рэкалекцый, якія ўжо сталі традыцыяй. Пасля гэтых духоўных практыкаванняў яны вяртаюцца ў свае сем’і з новай энергіяй і жаданнем быць бліжэй да Бога, а таксама вучыцца ад Святой Сям’і, як далей крочыць праз жыццё.