10 красавіка, у Вялікую пятніцу, біскуп Гродзенскі Аляксандр Кашкевіч узначаліў Літургію Мукі Пана ў гродзенскай парафіі Адшукання Святога Крыжа (бэрнардынскі касцёл).
У галоўным алтары гэтай святыні, якая з’яўляецца найстарэйшай у горадзе, знаходзіцца прыгожы крыж.
Літургія складалася з чатырох частак: літургіі слова, адарацыі Святога Крыжа, святой Камуніі і перанясення Найсвяцейшага Сакрамэнту ў Гроб Пана.
Літургія пачалася ў цішыні, калі перад алтаром біскуп лёг на падлогу крыжам. Гэты знак сімвалізуе Хрыстовую ахвяру. Вернікі ў гэты час дзякавалі за дар адкуплення, за тое, што Бог ніколі не пакідае і жадае збаўлення ўсіх, і за ласку трывання з Хрыстом, пачатак якой паклаў у іх святы хрост.
Таксама было прачытана апісанне мукі Пана, перададзенае святым Янам, які сведчыць аб тым, што бачыў на Галгоце. Для яго Укрыжаваны з’яўляецца Валадаром, вечным Сынам Божым, Святлом, якое асвятляе кожнага чалавека. Ян Евангеліст быццам адкрыў Божае Сэрца, якое хоча не судзіць людзей, а збавіць.
У гаміліі біскуп Аляксандр Кашкевіч казаў пра крыж і яго значэнне. Іерарх падкрэсліў, што крыж нагадвае чалавеку пра яго ўласную маласць, слабасць, схільнасць чыніць зло.
“У гэтым адзіным, Хрыстовым крыжы здзяйсняецца незвычайная перамена: прылада смерці становіцца дрэвам жыцця, бо чалавечая нянавісць становіцца пераможана Божай любоўю”, – дадаў біскуп.
Пастыр Касцёла на Гродзеншчыне падкрэсліў, што ў крыжы для людзей крыецца самая цудоўная навука аб міласэрнасці, ці аб любові, якая мацнейшая за кожны грэх, за ўсялякае зло, а нават і за саму смерць.
“Гэтая Божая любоў падымае чалавека з самага вялікага ўпадку і вызваляе ад найбольшых пагрозаў. Гэтая любоў верная да канца”, – сказаў іерарх, дадаўшы, што крыж Хрыста прамаўляе да кожнага, хто з верай і пакорай схіляецца над яго таямніцай.
Біскуп заахвоціў вернікаў у гэты асаблівы дзень у цішыні сэрцаў падзякаваць Пану Езусу за Яго муку, за кожную рану, за кожную слязу, за неспасцігальную велізарнасць Яго цярпення, калі Яго мука, смерць і ўваскрасенне заслужылі збаўленне кожнаму чалавеку і ўсяму свету.
Усе прысутныя ў касцёле ўшанавалі Святы Крыж, стаўшы на калені, а затым прынялі Камунію. На заканчэнне Літургіі Вялікай пятніцы Найсвяцейшы Сакрамэнт быў перанесены ў Гроб Пана, дзе да распачацця Літургіі Пасхальнай вігіліі вернікі будуць адараваць Хрыста, разважаючы пра Яго Муку.
Кс. Юрый Марціновіч
