25 сакавіка, ва ўрачыстасць Звеставання Пана, супольнасць Вышэйшай духоўнай семінарыі ў Гродне перажыла дзень засяроджання. Гэта магчымасць для кожнага семінарыста зрабіць для сябе “рахунак сумлення” адносна таго, як ён выкарыстаў дадзены Богам час на здабыванне ведаў і іншых духоўных каштоўнасцей.
Гэтыя духоўныя практыкаванні былі незвычайнымі. Ва ўрачыстасць Звеставання Пана адзначаецца Дзень святасці жыцця, калі Каталіцкі Касцёл асаблівым чынам акцэнтуе вялікую значнасць і святасць чалавечага жыцця ад зачацця да натуральнай смерці ў кантэксце звеставання Панне Марыі арханёлам Габрыэлем у Назарэце.
Менавіта з гэтай нагоды будучым святарам спадарожнічаў у разважанні над тэмамі бацькоўства, мацярынства і цэлібату дырэктар дабрачыннага фонду абароны жыцця і сям’і “Адкрытыя сэрцы” Уладзіслаў Валаховіч.
На працягу дня семінарысты мелі магчымасць больш часу прысвяціць малітве і разважанню над Божым словам. У праграме дня былі дзве канферэнцыі, якія адбыліся ў форме інтэрактыву, падчас якіх навучэнцы семінарыі маглі абмеркаваць пытанні, звязанныя з тэмамі сустрэчы, і падзяліцца сваімі думкамі.
Галоўным пунктам была святая Імша апоўдні, якую цэлебраваў духоўны айцец семінарыі ў Гродне кс. Ян Сарэла і напрыканцы якой група семінарыстаў урачыста прынесла абяцанні духоўнага ўсынаўлення ненароджанага дзіцяці.
Яшчэ адной важнай падзеяй дня засяроджання стала адарацыя Найсвяцейшага Сакрамэнту, падчас якой адбылося прысвячэнне нашай краіны Беззаганнаму Сэрцу Марыі і а 12-й гадзіне па закліку Папы Францішка семінарыйная супольнасць далучылася да малітвы “Ойча наш” у інтэнцыі выбаўлення свету ад каранавірусу.
Aндрэй Юхнік
Фота: Павел Леановіч