7 сакавіка біскуп Гродзенскі Аляксандр Кашкевіч благаславіў новую пральню, якая была адкрыта пры Доме міласэрнасці ў Каменцы (Шчучынскі дэканат).
Больш за 14 гадоў у Каменцы знаходзяць свой “дом” шмат пажылых і хворых людзей, закранутых невылечнымі хваробамі ці інваліднасцю. Домам апякуецца Кангрэгацыя Сясцёр Маці Міласэрнасці (Вастрабрамскай).
Сястра Фаўстына Цыдзік, генеральная настаяцельніца супольнасці і дырэктар Дома міласэрнасці, сёння мае пад апекай больш за 80 чалавек з розных частак нашай краіны.
У штодзённым служэнні гэтым асобам ёй дапамагаюць сацыяльныя работнікі і людзі добрай волі, якія стараюцца, каб кожны чалавек тут мог адчуваць сябе як найлепш. Тут жывуць і католікі, і праваслаўныя, няма падзелу на “вашых” і “нашых”. Таму жыхароў гэтага дома наведваюць як каталіцкі, так і праваслаўны святары.
Новая пральня паспрыяе лепшаму функцыянаванню Дома міласэрнасці. Людзі, якія ў ёй працуюць, будуць праць з дапамогай вялікіх пральных машын, прасаваць і пры неабходнасці рамантаваць адзенне, пасцельную бялізну і ручнікі для жыхароў гэтага дома.
Адкрыццё і ўладкаванне пральні стала магчымым дзякуючы неабыякавым людзям, якія аказалі падтрымку ў рамонце будынка і адпаведным абсталяванні.
Кс. Юрый Марціновіч
