Каманды з Гродна перамаглі на міжнародным турніры па футболе ў Варшаве

З 27 студзеня па 1 лютага ў Варшаве праходзіць XXIX Міжнародны турнір па футболе сярод дзяцей і моладзі ва ўзроставых групах з 2003 па 2010 г. нар.

У турніры, які арганізуе Каталіцкае спартыўнае таварыства Рэспублікі Польшча, удзельнічаюць каманды з Польшчы, Беларусі, Украіны, Літвы.

Прадстаўнікамі Гродзенскай дыяцэзіі на турніры сталі каманды 2003 і 2004 г. нар., у якія ўвайшлі гульцы з пяці парафій Гродна. Ініцыятарам зборных і апекуном групы стаў кс. Артур Малафей, адказны па справах спорту ў Гродзенскай дыяцэзіі.

Галоўныя мэты турніру – выхаванне дзяцей і моладзі праз занятак спортам, інтэграцыя са сваёй парафіяй, выхаванне ўмення правільна сябе паводзіць на пляцоўцы, падчас гульні і на трыбунах, планаваць вольны час у штодзённым жыцці.

Каманда Гродна 2004 г. нар. заняла 1-е месца на турніры. Лепшым бамбардзірам турніру ў гэтай катэгорыі стаў Ягор Сідорык з гэтай каманды, лепшым гульцом у той жа катэгорыі – Эдгар Барсукевіч.

Каманда Гродна 2003 г. нар. заняла 2-е месца. Лепшым гульцом у гэтай катэгорыі стаў Альфрэд Мазурыч з дадзенай каманды.

Пераможцы і прызёры турніру былі ўзнагароджаны кубкамі і памятнымі падарункамі ад арганізатараў. На цырымоніі ўзнагароджання прысутнічалі біскуп Варшаўска-Пражскай дыяцэзіі Рамуальд Камінскі, а таксама кіраўніцтва Вышэйшай духоўнай семінарыі ў гэтай дыяцэзіі.

Кожны ўдзельнік атрымаў спецыяльны прыз ад арганізатараў. Агульная малітва на пачатак і завяршэнне турніру дапамагала ўсім прысутным пранікнуцца атмасферай любові да Бога і бліжняга.

Кс. Артур Малафей

Фота: Станіслаў Барсукевіч