19 студзеня ў араторыі святога Яна Боско, які дзейнічае пры парафіі святога Міхала Арханёла ў Смаргоні, прайшоу “Снежны баль” для дзяцей, арганізаваны групай аніматараў пад кіраўніцтвам с. Юліі Клевец FMA і кс. Артура Ляшнеўскага SDB.
Як паведамляе партал sdb.by, cвяточная праграма распачалася св. Імшой, пасля якой дзеці і іх бацькі накіраваліся ў араторый, дзе для іх была падрыхтавана забаўляльная праграма.
Удзельнікі мелі магчымасць адправіцца на “Снежны баль” разам з Каем і Гердай, патанчыць і пагуляць у зімовыя забавы з героямі мультфільмаў.
Дзякуючы каманднаму духу і ўзаемадапамозе дзеці змаглі дапамагчы Снежнай каралеве знайсці дабрыню і любоў у глыбіні свайго сэрца.
