На заканчэнне перыяду Божага Нараджэння ў парафіі св. Станіслава Косткі ў Ваўкавыску адбылася дэканальная сустрэча дзяцей і моладзі.
На сустрэчу, арганізаваную па ініцыятыве дэкана Ваўкавыскага дэканату кс. каноніка Алега Дуля, прыбылі дзеці і моладзь з розных парафій, каб супольна спазнаць атмасферу калядных святаў. Сустрэча была таксама нагодай падзяліцца сваімі талентамі і ўменнямі, якімі іх адарыў Бог.
Цэнтрам сустрэчы была святая Імша, якую ўзначаліў кс. канонік Чэслаў Паўлюкевіч, кусташ санктуарыя Гродзенскай дыяцэзіі Пана Езуса Журботнага ў Росі.
Пасля Імшы некаторыя парафіі выступілі з прадстаўленнямі, іншыя спявалі калядкі і пастаралкі. Гэта быў сапраўды час супольнага дзялення і ўзбагачэння, час, калі можна было нанова здзейсніць пілігрымку ў Бэтлеем, каб адчуць любоў, якая паходзіць з бэтлеемскай пячоры, і цеплыню Святой Сям’і з Назарэта.
На заканчэнне сустрэчы адбыўся пачастунак, пасля чаго ўдзельнікі вярнуліся дадому, каб падзяліцца радасцю, якую атрымалі тут, з іншымі.
Кс. Юрый Марціновіч
Фота: Жанна Вераціла