11 студзеня ў Гродне адбылася аплаткавая сустрэча для навучэнцаў Тэалагічнага каледжа імя св. Казіміра. На сустрэчы сабраліся навучэнцы і выкладчыкі духоўнай навучальнай установы.
Сустрэча пачалася святой Імшой у капліцы Вышэйшай духоўнай семінарыі ў Гродне, якую ўзначаліў Генеральны вікарый Гродзенскай дыяцэзіі біскуп Юзаф Станеўскі.
У гаміліі іерарх падкрэсліў, што кожны хрысціянін мае заданне занесці ў свае месцы працы і вучобы, у сваё атачэнне любоў і цеплыню бэтлеемскіх ясляў.
Біскуп дадаў, што кожны год навучэнцы каледжа і кожны вернік павінны старацца знаходзіць у святах Божага Нараджэння штосьці новае і тым самым развівацца, інакш гэта будзе толькі знешняе святкаванне; што трэба прымаць актыўны ўдзел у стварэнні батлейкі, каб гэта не была праца толькі сакрыстыянаў і арганістаў і каб Слова не засталося толькі літарамі, напісанымі ў кнізе.
Біскуп заклікаў усіх навучэнцаў каледжа, каб у сучасным свеце яны ўказвалі іншым на хрысціянскія каштоўнасці, пра якія вельмі часта забываюць. Ён прасіў, каб кожны з іх быў для свайго найбліжэйшага атачэння прыкладам веры і любові да Бога і чалавека, a таксама натхненнем да дзеяння.
Пасля Імшы сустрэча працягнулася ў будынку Гродзенскай курыі. Там сабраныя дзяліліся аплаткамі, выказваючы адзін аднаму віншаванні. Таксама навучэнцы каледжа падрыхтавалі каляднае прадстаўленне, рэжысёрам якога выступіла Вікторыя Сідар – адна з іх.
Асноўнай мэтай прадстаўлення было паказаць, што маці – тая асоба, якая ўвасабляе ў жыццё любоў да Бога і з’яўляецца адлюстраваннем Яго любові.
Біскуп Юзаф Станеўскі падзякаваў навучэнцам за гэты прыгожы вечар і пажадаў, каб здабытая ў каледжы навука пашырылa для іх гарызонты жыцця, каб яны яшчэ больш пазнавалі Бога і імкнуліся дзяліцца Ім з іншымі.
Kс. Юрый Марціновіч
Фотa: Алена Харольская