У другі дзень святаў Божага Нарадження наймалодшыя вернікі парафіі Святога Духа ў гродзенскім мікрарайоне Альшанка ўпершыню прадставілі батлейку пра нараджэнне Езуса.
Самаму малодшаму ўдзельніку было 3 гады, а найстарэйшаму 5 гадоў. Падчас прадстаўлення маладыя артысты прачыталі вершы пра Божае нараджэнне на розных мовах, а таксама ўзбагацілі прадстаўленне шматлікімі танцамі.
Варта падкрэсліць вялікі клопат бацькоў, якія падрыхтавалі для сваіх дзяцей касцюмы на вельмі высокім узроўні.
Напрыканцы пробашч парафіі кс. Павел Салабуда падзякаваў усім маладым артыстам, а таксама іх бацькам, падкрэсліўшы факт духоўнага выхавання дзяцей ад самага малодшага ўзросту. “Як малое зярнятка ў добрай глебе прыносіць добры плён, так і сёння ў гэтых маленькіх сэрцах, дзякуючы намаганням і клопату бацькоў, мы пасеялі малое зярнятка веры, якое пазней дасць у іх жыцці добры плён”, – сказаў святар.
Спецыяльным госцем на прадстаўленні былі валанцёры дабрачыннага каталіцкага таварыства “Карытас” Гродзенскай дыяцэзіі, якія пасля яго ўручылі ўсім артыстам святочныя падарункі.
Святочны настрой у маладых парафіянаў Альшанкі працягваецца далей. Між іншым, пры парафіі сёння існуюць тры катэхетычныя групы для малодшых дзяцей узроўню дзіцячага садка.
