Аплаткавая сустрэча духавенства прайшла ў Гродне

20 снежня ў Вышэйшай духоўнай семінарыі ў Гродне прайшла аплаткавая сустрэча святароў і сясцёр законных, якія служаць у Гродзенскай дыяцэзіі.

У сустрэчы ўдзельнічалі таксама біскуп Гродзенскі Аляксандр Кашкевіч і дапаможны біскуп Гродзенскай дыяцэзіі Юзаф Станеўскі.

Сустрэча пачалася малітвай Літургіі гадзін, затым адбылася канферэнцыя, а пасля адарацыя Найсвяцейшага Сакрамэнту.

Біскуп Кашкевіч перад дзяленнем аплаткай звярнуўся да ўсіх прысутных святароў і сясцёр законных. Іерарх падзякаваў за штодзённае служэнне ў Хрыстовым Касцёле, за прысвячэнне і клопат пра вернікаў, даручаных ім.

Ад імя ўсіх духоўных асобаў, якія служаць у дыяцэзіі, віншаванні ардынарыю выказаў біскуп Станеўскі.

Затым прысутныя мелі магчымасць павіншаваць адзін аднаго і разам паабедаць.

Гэта быў другі тур аплаткавай сустрэчы. Першы адбыўся 18 снежня ў лідскай парафіі Святой Сям’і.

Кс. Юрый Марціновіч

Фота: Аляксандра Шчыглінская