29 лістапада біскуп Юзаф Станеўскі адзначыў 6-ю гадавіну біскупскай намінацыі. Роўна 6 гадоў таму Святы Айцец Францішак прызначыў кс. прэлата Юзафа Станеўскага, тагачаснага рэктара Вышэйшай духоўнай семінарыі ў Гродне, дапаможным біскупам Гродзенскай дыяцэзіі.
Разам з ім намінацыі атрымалі сённяшні біскуп Віцебскай дыяцэзіі Алег Буткевіч і сённяшні дапаможны біскуп Мінска-Магілёўскай архідыяцэзіі Юрый Касабуцкі.
Урачыстая Імша з гэтай нагоды, якую ўзначаліў біскуп Станеўскі, адбылася ў капліцы Вышэйшай духоўнай семінарыі ў Гродне, якой ён прысвяціў шмат гадоў свайго святарскага служэння як прэфект, а потым рэктар. Менавіта ў гэтым месцы адбылося 6 гадоў таму абвяшчэнне гэтай радаснай навіны ў прысутнасці біскупа Гродзенскага Аляксандра Кашкевіча, святароў Гродзенскай дыяцэзіі і семінарыйнай супольнасці.
Падчас Эўхарыстыі разам з біскупам Юзафам уся супольнасць семінарыі дзякавала Богу за гэты невымоўны дар паклікання і біскупства, што з’яўляецца таксама вялікім гонарам Гродзенскай дыяцэзіі і дарам для ўсяго Паўсюднага Касцёла.
Aндрэй Юхнік
Фота: Павел Леановіч