На ўрачыстасць Усіх Святых у касцёле св. Уладзіслава ў Суботніках (Iўеўскі дэканат) збіраюцца не толькі парафіяне, але і вернікі з іншых мясцін Беларусі і нават з суседняй Літвы, каб памаліцца разам, наведаць могілкі, ушаноўваючы тым самым памяць продкаў.
Сёлета падчас святой Імшы ў гэты дзень пробашч парафіі кс. Аляксандр Лебядзевіч распавёў у гаміліі пра тры вымярэнні Касцёла: Касцёл пілігрымуючы, пакутуючы і трыумфуючы. 1 лістапада – свята ўсяго трыумфуючага Касцёла ў нябёсах, далучыцца да якога мы імкнёмся і які ўшаноўваем на зямлі.
Святар расказаў аповед пра маці, што прыехала ў госці да сына, у доме якога было ўсё, што патрэбна сучаснаму чалавеку, і кожны дзень быў распланаваны па хвілінах, не хапала толькі аднаго – месца і часу для Бога. Як часта многім таксама не хапае часу для Езуса, вера ў Бога становіцца “нямоднай”. Аднак сын гэты не ведаў, што папярэднічала яго нараджэнню. І калі б не вера яго маці, то мог бы і не з’явіцца на свет. Таксама святар нагадаў, што сэрца, якое поўніцца любоўю да бліжняга, з’яўляецца дарогай да святасці.
На заканчэнне Імшы быў праспяваны гімн “Цябе, Бога, праслаўляем”.
Пасля Эўхарыстыі адбылася працэсія на могілках, падчас якой вернікі маліліся Вяночак да Божай Міласэрнасці. На могілках памаліліся таксама Ружанец у інтэнцыі ўсіх памерлых.
Пробашч падзякаваў усім прысутным за ўдзел ва ўрачыстасці і супольную малітву. Затым адбылося благаслаўленне новых помнікаў, а сабраныя мелі магчымасць запаліць свечкі на магілах родных і знаёмых і памаліцца аб збаўленні іх душаў.
Людміла Пясецкая
