70-годдзе біскупа Аляксандра Кашкевіча адзначылі ў гродзенскай катэдры

23 верасня ў катэдральным касцёле св. Францішка Ксаверыя ў Гродне адбылася святая Імша падзякі за 70 гадоў жыцця біскупа Гродзенскага Аляксандра Кашкевіча.

У гэты дзень пастыр Касцёла на Гродзеншчыне, які кіруе ім з самага пачатку заснавання дыяцэзіі – з 1991 г. – дзякаваў Пану Богу за дар свайго жыцця і за ўсіх людзей, якіх Божы Провід паставіў на ягоным шляху.

На Эўхарыстыі сабраліся шматлікія святары, сёстры законныя, а таксама вернікі, якія прыбылі, каб падтрымаць малітвай свайго пастыра. Прысутнічалі дапаможныя біскупы Мінска-Магілёўскай архідыяцэзіі Юрый Касабуцкі і Аляксандр Яшэўскі SDB. Не мог не прысутнічаць і найбліжэйшы супрацоўнік біскупа Кашкевіча – дапаможны біскуп Гродзенскай дыяцэзіі Юзаф Станеўскі.

Іерарх прамовіў гамілію, у якой вярнуўся думкамі да роднага дома Кашкевічаў у вёсцы Падгайдзі, у парафіі Эйшышкі Віленскай архідыяцэзіі. Ён узгадаў памерлых бацькоў біскупа Алякандра – Юзафа і Марыі, якія заклалі фундамент яго чалавечнасці, даўшы падставу для святарства.

Іерарх адзначыў, што падчас святкаванняў юбілеяў і круглых датаў заўсёды два важныя моманты: падзяка і пажаданні. Падчас падзякаў мы ўспамінаем аб дасягненнях юбіляра, падчас пажаданняў гучыць тое, што датычыць будучыні.

Ён падкрэсліў, што за больш чым 28 гадоў пастырства біскупа Кашкевіча ў дыяцэзіі было рэалізавана шмат душпастырскіх праектаў, паўстала шмат прыгожых спраў, якія прыносяць плён у сэрцах многіх дыяцэзіян. “Як шмат у гэты час было здзейснена праектаў і задумаў пастырскага клопату біскупа Аляксандра. Пра многія рэчы не ўсе ведаюць, бо, як сам шаноўны юбіляр прывык паўтараць, “менш пісання, а больш дзеяння””, – дадаў іерарх.

Па яго словах, тое, што было зроблена, безумоўна, будзе заўважана – важна, каб каб гэта дасягнула чалавека патрабуючага, згодна з Божым планам. “Прызнаем, што за гэты час змянілася аблічча зямлі, гэтай зямлі”, – сказаў іерарх.

У адрас юбіляра прагучала шмат добрых слоў і пажаданняў. Ад імя ўсіх святароў дыяцэзіі віншаванні выказаў кс. канонік Уладзімір Гуляй, біскупскі вікарый Лідскага рэгіёну. Ад імя сясцёр законных да біскупа звярнулася с. Ерамія Кулікоўская CSFN. Да віншаванняў далучылася грэка-каталіцкая супольнасць, ад імя якой пажаданні біскупу выказаў душпастыр гродзенскай парафіі Маці Божай Фацімскай а. Андрэй Крот.

Віншаванні выказалі між іншым таксама семінарысты, нваучэнцы Тэалагічнага каледжа св. Казіміра і наймалодшыя дыяцэзіяне – дзеці.

На заканчэнне ўрачыстасці біскуп Аляксандр падзякаваў усім за столькі цеплыні і дабрыні, колькі атрымаў і працягвае атрымліваць ад сваіх дыяцэзіян. Ён адзначыў, што для яго гэты дзень – магчымасць зірнуць на мінулае, а таксама нагода з надзеяй і адвагай углядацца ў будучыню.

Біскуп падзякаваў за прысутнасць, а асабліва за дар малітвы, якая была ў гэты дзень узнесена да Бога ў галоўнай святыні дыяцэзіі, а таксама з усіх яе бакоў.

Кс. Юрый Марціновіч

Фота: Павел Леановіч