Дапаможны біскуп Гродзенскай дыяцэзіі Юзаф Станеўскі, які з’яўляецца адказным за душпастырства моладзі ў Канферэнцыі Каталіцкіх Біскупаў у Беларусі, прыняў удзел ва ўрачыстым благаслаўленнi моладзі і студэнтаў на новы навучальны год, якое адбылося ў Мінску.
Як паведамляе Catholic.by, 19 верасня ў мінскай архікатэдры Найсвяцейшага Імя Марыі адбылася святая Імша ў інтэнцыі моладзі, якая распачала новы навучальны год. Цэлебрацыю літургіі ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч.
Падчас Імшы арцыбіскуп між іншым нагадаў моладзі, што трэба ўзрастаць не толькі інтэлектуальна, але і духоўна. Напрыканцы Імшы іерарх удзяліў моладзі і студэнтам спецыяльнае благаслаўленне, а таксама благаславіў залікоўкі.
Пасля Эўхарыстыі распачалася першая ў гэтым навучальным годзе агульная сустрэча моладзі ў архікатэдры, на якой сабраліся маладыя людзі з розных парафій сталіцы. Сустрэча праходзіла ў форме дыялогу з іерархамі. Маладыя людзі мелі магчымасць задаць пытанні, якія іх хвалююць. Іерархі з радасцю адказвалі, дзяліліся сваімі думкамі і ўспамінамі, жартавалі.
Біскуп Юзаф Станеўскі заклікаў моладзь чытаць Апостальскую адгартацыю папы Францішка Christus Vivit, якую неаднойчы цытаваў падчас сустрэчы.
Таксама ён заахвоціў памятаць пра свае карані, прыслухоўвацца да сваіх бабуль і дзядуляў, бо ім, якія праз гады захавалі веру, ёсць што нам сказаць.
Напрыканцы біскуп пажадаў маладым людзям словамі папы Францішка: «Няхай Дух Святы прыспешвае вас да бегу наперад. Касцёл патрабуе вашага энтузіязму, вашых ідэй, вашай веры. Нам гэта патрэбна! І калі дойдзеце туды, куды мы яшчэ не дайшлі, будзьце цярплівымі, пачакайце нас».
Сустрэча з іерархамі стала нагодай, каб натхніць моладзь не толькі на добрую вучобу, але і на добрыя ўчынкі.
Фотa: Catholic.by
