Літургічны ўспамін св. Аўгустына, біскупа і доктара Касцёла, які адзначаецца 28 жніўня, з'яўляецца вялікай урачыстасцю і галоўным патранальным святам Ордэна рэгулярных латэранскіх канонікаў.
У гэты дзень у базыліцы Божага Цела ў Кракаве (Польшча) адбылася ўрачыстая Эўхарыстыя, якую ўзначаліў генеральны настаяцель гэтай манаскай супольнасці кс. Франко Бергаміно CRL.
Падчас Імшы між іншым семінарыст Віктар Рушлевіч CRL, які паходзіць з парафіі Перамянення Пана ў Вавёрцы (Лідскі дэканат), прыняў вечныя манаскія абяцанні. Праз іх прыняцце ён назаўсёды злучыў сваё жыццё з ордэнам.
Ордэн рэгулярных канонікаў засноўвае сваю духоўнасць на Рэгуле св. Аўгустына. Ён практыкуе евангельскія цноты паслухмянасці, чыстасці і супольнага жыцця без уласнасці. Ордэн не прывязвае сваю душпастырскую дзейнасць да нейкай канкрэтнай сферы. Ён адкрыты на любую форму працы ў Касцёле.
Дэвіз ордэну, у якім заключаецца ўся яго місія, – словы з Дзеяў Апосталаў: мець «адно сэрца і адзін дух», як у манаскім жыцці ў кляштарах, так і ў душпастырскім служэнні Касцёлу.
У Беларусі рэгулярныя латэранскія канонікі служаць ужо шмат гадоў на тэрыторыі Гродзенскай дыяцэзіі – у Вавёрцы, ядкуль паходзіць семінарыст Віктар Рушлевіч. Зараз там служыць адзін святар, які таксама паходзіць з гэтай парафіі – кс. Андрэй Роўба CRL.
Kс. Юрый Марціновіч
