Як паведамляe «Новае жыццё», мерапрыемства пачалося са святой Імшы ў мясцовай святыні. Затым на тэрыторыі касцёла адбылося ўрачыстае адкрыццё.
Вітаючы прысутных, пробашч парафіі ксёндз Віталій Цыбульскі падзякаваў усім, хто прымае актыўны ўдзел у жыцці парафіі і дапамагаў у падрыхтоўцы свята.
Святар, які з’яўляецца ідэйным натхняльнікам і асноўным арганізатарам фэсту, адзначыў, што мерапрыемства ладзіцца для таго, каб аб’яднаць людзей розных узростаў, веравызнанняў, прафесій, з рознымі захапленнямі і талентамі. А таксама даць магчымасць кожнаму ўдзельніку свята знайсці сабе занятак па душы, адпачыць цікава і карысна.
На тэрыторыі касцёла падрыхтавалі некалькі тэматычных зон – гульнявая, творчая, танцавальная і іншыя. Праходзілі майстар-класы ад мясцовых майстроў, ладзіліся бяспройгрышная латарэя і розыгрыш суперпрыза, працавалі музей пад адкрытым небам, выстаўкі-продажы і летнія кафэ.
На галоўнай сцэне выступілі аматарскія калектывы і артысты Навагрудчыны і іншых раёнаў. У дзяцей асаблівай папулярнасцю карысталіся забавы ХІХ стагоддзя і сучасныя гульні.
Святочная праграма ў наведвальнікаў выклікала шмат станоўчых эмоцый і ўражанняў. Усе гаварылі аб тым, каб фэст стаў штогадовым і збіраў яшчэ больш людзей.
Арганізатарамі свята выступілі парафія Святога Казіміра і аддзел культуры Навагрудскага райвыканкама.
