Як паведамляе catholic.by, на першы год у другім туры было прынята трое кандыдатаў. Двое з іх паходзяць з Гродзенскай дыяцэзіі: Андрэй Рушніцкі (парафія Божай Міласэрнасці, Гродна) і Максім Ваўчок (парафія Маці Божай Тройчы Цудоўнай, Масты).
Экзамен прымала камісія ў наступным складзе: ксёндз Павел Эйсмант, куратар 1-га курса, старшыня камісіі, i ксёндз Юрый Пракапюк, віцэ-рэктар Вышэйшай духоўнай семінарыі ў Пінску.
Экзаменацыйныя пытанні датычыліся Катэхізісa Каталіцкага Касцёла, жыцця паўсюднага і мясцовага Касцёла, яго структуры з мэтай лепш ацаніць зацікаўленасць кандыдатаў тым, як жыве Касцёл.
Пасля пісьмовай часткі экзамену кандыдаты сустрэліся з адным з членаў камісіі на кваліфікацыйнай размове.
Нагадаем, што па выніках першага туру ўступнага экзамену, які прайшоў у Мінску 24 ліпеня, на першы курс ужо былі залічаны пяць кандыдатаў: трое з Гродзенскай дыяцэзіі і па адным з Віцебскай дыяцэзіі і Мінска-Магілёўскай архідыяцэзіі. Таму ў верасні сваю фармацыю да святарства распачнуць восем чалавек, пяць з якіх паходзяць з Гродзенскай дыяцэзіі.
