26 ліпеня дапаможны біскуп Гродзенскай дыяцэзіі Юзаф Станеўскі наведаў парафіяльную супольнасць у Перстуні (Сапоцкінскі дэканат) у адпустовую ўрачыстасць у гонар св. Ганны, маці Найсвяцейшай Панны Марыі.
На ўрачыстай літургіі, якой папярэднічала малітва Ружанца ў інтэнцыі святароў, новых пакліканняў да служэння ў Касцёле, аб добрым ураджаі і за ўсіх, чыёй апякункай з’яўляецца св. Ганна, сабраліся шматлікія парафіяне і госці.
У гаміліі біскуп, кажучы пра св. Ганну, заснаваў свае разважанні на ролі маці ў сучасным свеце. Ён адзначыў, што кожная маці павінна падтрымліваць найдаражэйшыя каштоўнасці традыцыі, культуры і рэлігіі, бо гэта задума самога Бога.
“Калі мы хочам, каб лепей выглядалі сёння нашы сем’і і парафіі, дыяцэзія і краіна, нам вельмі патрэбны маці, якія моляцца”, – сказаў іерарх. Ён падкрэсліў, што кожная маці павінна ўсё сваё сэрца ўкладваць у дом і сям’ю.
“Маці павінны сёння стаць у першых шэрагах абаронцаў веры і чысціні звычаяў. Ім нельга забываць, што яны павінны быць дапамогай у чыненні дабра”, – дадаў біскуп.
Па яго словах, на жаль, у нашы часы здараецца, што маці ідуць крок у крок з хваляй сапсаванасці, якая пагражае чалавечаму жыццю, сціпласці, чысціні звычаяў.
На заканчэнне Імшы пробашч парафіі кс. Павел Гедройць падзякаваў іерарху за прыбыццё і супольную малітву. Святар выказаў словы ўдзячнасці таксама сваім парафіянам, якія ахвярна клапоцяцца аб сваёй святыні, што становіцца з кожным месяцам усё прыгажэйшай. “Гэта добрыя людзі, якія любяць Касцёл, любяць Пана Бога і сваю зямлю”, – выказаўся пробашч пра парафіян.
Урачыстасць завяршылася эўхарыстычнай працэсіяй вакол святыні.
Kс. Юрый Марціновіч