29 чэрвеня з санктуарыя Маці Божай Шкаплернай у Гудагаі (Астравецкі дэканат) вырушыла IX пешая пілігрымка ў Нацыянальны санктуарый Маці Божай у Будславе.
У шлях, які будзе працягвацца сем дзён, выйшлі 62 пілігрымы – людзі ўсіх узростаў і нават некалькіх нацыянальнасцяў. Ім спадарожнічаюць і атачаюць духоўнай апекай тры святары і тры сястры законныя. Старэйшаму пілігрыму – 72 гады, самаму малодшаму – 2.
Пілігрымка адрозніваецца нетыповымі шляхамі і вельмі прыгожымі краявідамі. Дарога вядзе праз лес, поле, а частку яе нават трэба пераадолець у чаўнах па рацэ.
Як кожная пілігрымка, дадзеная мае свой колер – аранжавы. Айцец Казімір Мараўскі OCD, яе кіраўнік, гаворыць, што такі выбар абумоўлены тым, што аранжавы – самы бачны, менавіта таму Гудагай лёгка знайсці паміж іншымі пілігрымкамі.
На дадзены момант пройдзена ўжо больш за 60 км. На заканчэнне другога дня пілігрымкі адбыўся „хрост” – абрад пасвячэння ў пілігрымы "Гудагай-Будслаў", а на вячэру быў прыгатаваны вельмі смачны шашлык.
Kс. Юрый Марціновіч