Супрацоўнікі і валанцёры дабрачыннага каталіцкага таварыства “Карытас” Гродзенскай дыяцэзіі рыхтуюць дабрачынны калядны кірмаш. Ён адбудзецца ў ІІІ нядзелю Адвэнту, 16 снежня, у гродзенскай парафіі Найсвяцейшага Збаўцы (Дзевятоўка).
На кірмашы кожны жадаючы пасля святых Імшаў, якія будуць праходзіць у гэты дзень, зможа набыць сувеніры каляднай і навагодняй тэматыкі, вігілійныя свечкі, гіпсавыя фігуркі Панны Марыі, Святой Сям’і, анёлаў і шмат іншых вырабаў ручной працы. Усё гэта было зроблена валанцёрамі дабрачыннага таварыства і выхаванцамі дамоў-інтэрнатаў, якія разам са сваімі выхавацелямі стварылі прыгожыя сувеніры і навагоднія цацкі.
Выручаныя ад продажу вырабаў сродкі будуць накіраваны для дзяцей-інвалідаў, дзяцей з малазабяспечаных сем’яў, дзяцей, якія засталіся без бацькоўскай апекі, і на падтрымку “Мабільнай дапамогі” (для самотных і хворых людзей).
Супрацоўнікі “Карытас” заахвочваюць усіх вернікаў да ўдзелу ў дабрачыннай акцыі, каб такім чынам, усім разам, падзяліцца радасцю з тымі, хто знаходзіцца ў патрэбе, каб яны таксама маглі спазнаць радасць, што сыходзіць са святаў Божага Нараджэння.
Kс. Юрый Марціновіч