На выхадных 24-25 лістапада ў гродзенскім пабрыгіцкім касцёле завяршыўся "Тыдзень талентаў".

У суботу адбылася вечарына дзіцячай і моладзевай творчасці. Аніматары падрыхтавалі для дзяцей цікавую праграму, падчас якой хлопцы і дзяўчаты маглі пераўвасобіцца ў мастакоў, музыкаў, скульптараў. Дзяўчыны-выхавальніцы выдатна праявілі талент кантактавання з дзецьмі. Пасля св. Імшы адбылася забаўляльная і пазнавальная праграма для моладзі. Віталь Шмурай правёў майстар-клас па фотаздымцы. Затым прайшоў танцавальны флэш-моб.

На нядзельнай ўрачыстай св. Імшы удзельнікі "Тыдня талентаў" дзякавалі Богу за здольнасці, якімі Ён шчодра іх адарыў. Прыгожыя спевы, малітвы ў вершах і прозе, сімвалічныя дары, прынесеныя на алтар Пана - вось тое, чым вернікі праслаўлялі Госпада.

Пасля св. Імшы адбыўся заключны канцэрт, падвядзенне вынікаў, кароткі агляд кожнага дня. Удзельнікі таксама мелі магчымасць падзяліцца сваімі ўражаннямі аб мерапрыемстве. Многія за гэты час ўмацавалі сваю сувязь з Богам, у некаторых з'явіліся новыя сябры. Выдатным завяршэннем тыдня стала правядзенне дабрачыннай латарэі, падчас якой былі разыграны прадметы дэкору, створаныя рукамі дзяцей з карэкцыйнага цэнтра сумесна з педагогам, і рэчы, ахвяраваныя рукадзельніцамі з душпастырства. Сродкі, атрыманыя падчас латарэі, пойдуць на патрэбы хворых дзяцей.

Усе ўдзельнікі "Тыдня талентаў" прыйшлі да адзінагалоснай думкі, што падобныя мерапрыемствы варта абавязкова паўтараць. Яны спрыяюць духоўнаму росту і развіццю, а таксама дапамагаюць адкрываць адзін у адным штосьці новае і добрае.

Ганна Паўловіч