29-31 кастрычніка ў кляштары Кангрэгацыi Сясцёр Найсвяцейшай Сям’і з Назарэта (назарэтанкі) у Навагрудку адбылася сустрэча дзяўчат. На духоўныя практыкаванні прыбылі 32 удзельніцы з Мінска, Гродна, Геранёнаў, Войстама, Маладзечна, Навагрудка.
Сустрэча праходзіла пад назвай “Дзіўны Пан у сваіх святых”. Ксёндз Уладзіслаў Сурвіла і сёстры назарэтанкі пазнаёмілі ўдзельніц з жыццём бл. сястры Стэлы і яе дзесяці паплечніц, мучаніц з Навагрудка, і разам з дзяўчатамі разважалі аб нашым шляху да святасці.
Быў час на малітву ля рэліквій благаслаўлёных мучаніц, калі можна было асабліва адчуць іх прысутнасць і вялікую моц іх заступніцтва перад Богам.
У вольныя хвіліны была магчымасць размовы і супольнага прабывання разам. Дзяўчаты пакідалі кляштар назарэтанак з вялікім спакоем і радасцю ў сэрцах, а таксама з думкай, якую ўсвядомілі падчас гэтых кароткіх рэкалекцый – святасць магчымая і сёння!
Kс. Юрый Марціновіч
Фота: с. Кляра Волчэк
