6 кастрычніка біскуп Гродзенскі Аляксандр Кашкевіч узначаліў адпустовую ўрачыстасць у парафіі Маці Божай Ружанцовай у Песках.
Іерарх прыбыў у парафію, каб у гэты асаблівы для яе вернікаў дзень нагадаць пра патрэбу ружанцовай малітвы, да якой заахвочвае ўсіх людзей сама Марыя.
На Эўхарыстыі сабраліся шматлікія парафіяне, а таксама святары Мастоўскага дэканату.
У гаміліі кс. Юрый Марціновіч, адказны за сродкі масавай інфармацыі Гродзенскай дыяцэзіі, падкрэсліў важнасць ружанцовай малітвы ў жыцці кожнага чалавека. Святар адзначыў, што гэтая малітва павінна стаць зброяй кожнага.
“Безумоўна, гэтая малітва на ружанцы дапаможа нам перамагчы зло і абвяшчаць Божае Валадарства, багацце якога – мір і любоў”, – дадаў кс. Марціновіч.
Пасля эўхарыстычнай працэсіі вакол святыні біскуп Кашкевіч, нагадваючы, што ў гэты дзень адбываецца таксама кананічная візітацыя парафіі, падзякаваў вернікам за іх вялікую любоў і прывязанасць да Касцёла. Іерарх заклікаў, каб ружанцовая малітва стала штодзённай практыкай у кожным доме і сям’і.
Біскуп заахвоціў вернікаў менавіта ў гэтай малітве чэрпаць патрэбныя сілы для штодзённага пераадолення ўсялякіх жыццёвых цяжкасцяў і шукаць унутранага міру, які дае Найсвяцейшая Панна Марыя.
Пробашч парафіі кс. Томаш Станзецкі падзякаваў біскупу за дар супольнай малітвы і выказаў вялікае пажаданне, каб гэтая сустрэча прынесла благаслаўлёныя плёны ў жыцці ўсіх парафіян.
JM
