Сустрэчы для людзей, якія знаходзяцца ў патрэбе, перад урачыстасцю Нараджэння Пана аранізавала парафія Свв. апосталаў Пятра і Паўла ў Іўі.
Разам з пробашчам кс. Янам Гавецкім валанцёры падзяліліся аплаткай і ўручылі святочныя падарункі ад вернікаў парафіі пажылым людзям і інвалідам у аддзяленні кругласутачнага прабывання для грамадзян пажылога ўзросту ў вёсцы Лукашына (Іўеўскі раён).
Чарговай акцыяй, мэтай якой было звярнуць увагу на бедных, самотных і інвалідаў, была ўжо традыцыйная аплаткавая сустрэча для катэгорыі такіх людзей, што адбылася ў рэстаране ў Іўі 22 снежня. Рэстаран прадаставіла для сустрэчы адна з парафіянак.
За святочным сталом у рэстаране сабралося каля 50 чалавек, якія мелі магчымасць спазнаць цяпло і дабрыню з боку іўеўскага пробашча і вернікаў. У падрыхтоўку стала ўключыліся самі парафіяне, якія супольнымі сіламі прыгатавалі святочныя стравы.
Усе прысутныя атрымалі падарункі ад парафіян, якія ўдалося набыць дзякуючы акцыям, арганізаваным парафіяльным “Карытас” у перыяд Адвэнту.
Як адзначае кс. Ян Гавецкі, у іўеўскай парафіі заўсёды звяртаецца вялікая ўвага на людзей, якім патрэбна дапамога і падтрымка. Гэта нагода, каб нагадаць такім людзям, што яны не самотныя, а побач з імі ёсць добрыя і ахвярныя парафіяне, якія, калі ёсць такая патрэба, працягваюць руку дапамогі.
Кс. Юрый Марціновіч
