2-3 снежня ў парафіі Святога Юды Тадэвуша ў Вішневе (Смаргонскі дэканат) адбыліся парафіяльныя адвэнтавыя рэкалекцыі. Іх правёў дапаможны біскуп Гродзенскай дыяцэзіі біскуп Юзаф Станеўскі.
Адвэнтавыя рэкалекцыі былі прымеркаваны да 15-й гадавіны смерці шматгадовага пробашча (1940–2002) вішнеўскай парафіі ксяндза Юзафа Кіселя. Ён пражыў доўгае 94-гадовае жыццё, і яго імя залатымі літарамі ўпісана ў гісторыю парафіі Св. Юды Тадэвуша.
Біскуп Юзаф Станеўскі ў сваіх рэкалекцыйных навуках рыхтаваў сэрцы вернікаў да Нараджэння Збаўцы, вучыў любові да бліжняга, заклікаў да малітвы аб пакліканнях да святарскага, манаскага і місіянерскага жыцця.
Іерарх маліўся ў інтэнцыі цяперашняга пробашча кс. Антона Казлоўскага і яго папярэдніка, дэкана Іўеўскага дэканата кс. Віктара Субеля, і іх сем’яў, а таксама аб пакліканнях да Божай службы з вішнеўскай парафіі.
На Імшу суму, якая цэлебравалася ў інтэнцыі ксяндза Юзафа Кіселя ў 15-ю гадавіну смерці, прыбылі шматлікія вернікі і святары: мядзельскі дэкан кс. канонік Багуслаў Манджэеўскі, пробашч са Свіры, ашмянскі дэкан грэміяльны канонік кс. Ян Пузына, пробашч з Ашмянаў, дыякан Мікалай Гракаў з Маладзечна.
На пачатку нядзельнай Імшы іерарх асвяціў новыя жырандолі, якія былі ўсталяваны ў касцёле дзякуючы ахвяраванням парафіян.
Рэкалекцыі завяршыліся спяванай малітвай “Анёл Панскі” на адноўленай магіле кс. Юзафа Кіселя і біскупскім благаслаўленнем.
Кс. Антон Казлоўскі
