24 чэрвеня пачаліся ўрачыстасці 100-годдзя існавання парафіі Найсвяцейшага Сэрца Пана Езуса i св. Язафата Кунцэвіча ў Заневічах. Іх узначаліў біскуп Гродзенскі Аляксандр Кашкевіч.
Пачаткам святкавання юбілею была абрана Абрэмшчына, якая знаходзіцца на тэрыторыі парафіі, – месца, асаблівае для Гродзеншчыны. Сюды прыбыло шмат гасцей, сярод якіх шматлікія святары, у тым ліку і тыя, якія паходзяць з гэтых зямель, манахіні, прадстаўнікі мясцовай улады і вернікі з розных куткоў Гродзеншчыны. Прыехалі таксама 15 сваякоў бл. Цэліны Бажэнцкай, якая пражыла ў Абрэмшчыне 22 гады.
Тут яна па волі бацькоў выйшла замуж за Юзафа Бажэнцкага, хоць з дзяцінства хацела служыць Богу як законная сястра. Тут нарадзіла чацвярых дзяцей: дваіх пахавала, дваіх выгадавала. Ва ўзросце 41 год аўдавела. Пасля смерці мужа рэалізавала жаданне, якое мела з дзяцінства. Калі старэйшая дачка выйшла замуж, разам з малодшай дачкой Ядзвігай паехала ў Рым i стала заснавальніцай новай супольнасці Сясцёр Змёртвыхпаўстанак. У памяць аб слыннай бласлаўлёнай на месцы, дзе калісьці стаяў дом Бажэнцкіх, а сёння знаходзіцца калгаснае поле, у 2007 годзе дзякуючы старанням святароў з гэтай парафіі і саміх парафіян была ўзведзена невялікая капліца.
У гаміліі Гродзенскі ардынарый заклікаў вернікаў дзякаваць Богу за ласку веры. Адзначыў, што каталіцкія звычаі вернікаў парафіі вызначалі іх штодзённае жыццё, “чалавечую нянавісць перамянялі ў любоў, а няшчасці адных нараджалі ў іншых запал несці дапамогу”. Іерарх дадаў, што плёнам рэлігійнага духу, якім прасякнута гэтая зямля, з’яўляецца і тое, што з маленькай парафіі ў Заневічах паходзяць дапаможны біскуп Гродзенскай дыяцэзіі Юзаф Станеўскі, шмат святароў і законных сясцёр, якія ахвярна служаць Касцёлу.
Біскуп заклікаў вернікаў далей нястомна клапаціцца аб тым, каб у парафіі заўсёды быў прысутны Езус, дбаць аб пераказе ў парафіі Божага слова, з зерня якога нараджаецца вера. “Ідзіце далей у пілігрымцы веры ў новыя часы. Няхай маладое пакаленне акажацца верным, а старэйшае ўмела перадае скарб веры, а таксама прыгожыя звычаі і традыцыі”, – заахвоціў іерарх.
На заканчэнне першага этапу урачыстасцей 100-годдзя існавання парафіі слова ўдзячнасці ў адрас прысутных прамовіў пробашч кс. Валерый Быкоўскі. Ён падзякаваў сваім папярэднікам – святарам, якія прыбылі, каб разам святкаваць гэтую падзею, а таксама вернікам, якія з вялікай пашанай атачаюць парафіяльную святыню і капліцу ў Абрэмшчыне. Святар адзначыў, што трэба асабліва дзякаваць Пану за дар жыцця і паклікання бл. Цэліны і праз яе заступніцтва маліцца, каб Бог быў праслаўлены ў жыцці кожнага чалавека, які жыве на роднай зямлі бласлаўлёнай.
Тэкст: Кс. Юрый Марціновіч
Фота: Сабіна Дзякун
