4 лютага цэнтр “ПАРА” (Падтрымка Анкахворых, Рэабіліцыя, Адаптацыя) сумесна з Рэлігійнай місіяй “Дабрачыннае каталіцкае таварыства “Карытас”” Гродзенскай дыяцэзіі арганізавалі “Дзень дабра”, які прайшоў на базе Гродзенскай клінічнай бальніцы №3 у аддзяленні “Хоспіс”.

Валанцёры “Карытас” прапанавалі пацыентам шмат цікавых паслуг. Тут былі міні-цырульня, масаж рук, прымерка ільняных дызайнерскіх капялюшыкаў ручной работы.

Таксама ў гэты дзень бальніцу наведалі вучні сярэдняй школы №8 г. Гродна. Яны прынеслі паштоўкі ручной работы і падарылі іх пацыентам, якім была вельмі прыемная такая ўвага.

Мерапрыемства суправаджалася салодкім сталом: валанцёры прапаноўвалі пацыентам смачную хатнюю выпечку з гарбатай.

Арганізатары сустрэчы адзначаюць, што такія мерапрыемствы вельмі важныя. Пацыенты пасля стрыжкі перамяняліся не толькі знешне: яны пачыналі ўсміхацца, любаваліся сабой у люстэрку і радаваліся таму, як ім пасуе прычоска, а сама ўтульная атмасфера і размовы за кубачкам гарбаты спрыялі паляпшэнню настрою.

Для валанцёраў гэта нагода, каб рабіць дабро іншым людзям. Гэта іх выражэнне міласэрнасці, аб якой яны сведчаць адпаведна словам Евангелля: “быў хворы, і вы адведалі Мяне”.

Гэта шлях, на якім кожны валанцёр і той, хто чыніць дабро, можа спаткаць Хрыста Валадара, чыё Валадарства з’яўляецца светам тых, каму патрэбна дапамога, і тых, хто нясе дапамогу. Валанцёры ўсведамляюць, што кожны раз, калі яны дапамагаюць іншым, яны абіраюць Езуса Валадаром.

Кс. Юрый Марціновіч