7 жніўня скончыліся ўрачыстасці ў санктуарыі Езуса Журботнага ў Росі. Св. Імшу з удзелам пілігрымаў, якія прыбылі ў пешых паломніцтвах з розных куткоў дыяцэзіі, цэлебраваў біскуп Гродзенскі Аляксандр Кашкевіч.
Вернікі сабраліся ў санкутарыі, каб ушанаваць фігуру Езуса Журботнага, бо бачаць у ёй знак асаблівай блізкасці Езуса Хрыста, які ніколі не перастае адорваць незлічонымі ласкамі і звышнатуральнымі дарамі.
Сёння мы прыходзім сюды, як гэта рабілі нашыя продкі, каб з верай і пакорай стаць на калені перад фігурай Езуса Журботнага і ў цішыні сэрца пачуць Яго голас, які кожнага з нас кліча па імені з любоўю, клопатам і бясконцай міласэрнасцю", - адзначыў у гаміліі біскуп Аляксандр Кашкевіч.
Іерарх падкрэсліў, што праз фігуру Езуса Журботнага Пан Бог асаблівым чынам прамаўляе да чалавека, нагадваючы кожнаму пра справу Адкуплення, якая была здзейснена праз муку, смерць і ўваскрасенне Ягонага Сына.
"Езус Журботны, спаглядаючы на нас з гэтай славутай ласкамі фігуры, пытаецца, ці мы, як хрысціяне, умеем і хочам заўважаць цярпенні нашых бліжніх, ці ўмеем убачыць у нашым браце або сястры, якія пакутуюць, аблічча Збаўцы?", - спытаў іерарх.
Кусташ санктуарыя ксёндз канонік Чэслаў Паўлюкевіч падзякаваў усім пілігрымам за труд пілігрымавання і запэўніў, што дзверы санктуарыя заўсёды адчынены, а таксама заахвоціў наведваць гэтае святое месца часцей.
Кс. Юрый Марціновіч
