19 мая, у свята Езуса Хрыста, Найвышэйшага і Вечнага Святара, у гродзенскім касцёле імя св. Францішка Ксаверыя падчас св. Імшы а 12 гадзіне адбылася інсталяцыя Гродзенскага катэдральнага капітула Унебаўзяцця Найсвяцейшай Панны Марыі і св. Казіміра Каралевіча. Гэта падзея з'яўляецца гістарычнай для маладой дыяцэзіі.
Капітул - гэта калегія духавенства, якая існуе пры катэдральнай святыні і з'яўляецца дарадчым органам пры біскупе. Акрамя гэтага капітул павінен клапаціцца пра адпаведнае здзяйсненне ва ўсёй дыяцэзіі цырымоній і абрадаў, якія праводзяцца дзеля хвалы Божай. Складаецца капітул з грэміяльных і ганаровых канонікаў, якім прызначаюцца дадзеныя тутылы ў знак падзякі за заслугі перад Касцёлам. Галоўным адрозненнем ганаровых канонікаў ад грэміяльных з'яўляецца тое, што апошнія маюць вызначаныя біскупам правы і абавязкі.
Гродзенскі катэдральны капітул складаецца з васьмі грэміяльных і дзевяці ганаровых канонікаў.
- Noblesse oblige (фр) - гонар абавязвае, - звярнуўся ў гаміліі да канонікаў кс. З. Вэдэр SDB, - і неабходна, каб прызначэнне гэтых тытулаў дапамагала вам узрастаць у веры і прыносіць добры плён.
Галоўнай часткай св. Імшы стаў сам абрад інсталяцыі капітулa: новыя канонікі прачыталі сімвал веры, склалі прысягу ў вернасці, а таксама атрымалі адзнакі годнасці - асвечанае адзенне каноніка і крыж (на адным баку з выявай св. Казіміра, на другім баку - з абразом Унебаўзяцця найсвяцейшай Панны Марыі. На ланцужку крыжа змяшчаецца выява герба г. Гродна). Элементам абраду было таксама заняцце праз канонікаў сваіх месцаў.
На заканчэнне ўрачыстасці кс. Генрык Яблонскі - дэкан капітула - ад імя усіх канонікаў падзякаваў кс. біскупу Аляксандру Кашкевічу за аказаны давер і паабяцаў, што яны будуць прыкладаваць усялякія намаганні, каб годна працягваць гісторыю развіцця Гродзенскай дыяцэзіі.
Ангеліна Марцішэўская, Ангеліна Пакачайла
