Адпустовую святую Імшу ва ўрачыстасць Маці Божай Чэнстахоўскай у капліцы ў Падольцах Астравецкага дэканату ўзначаліў кс. Анатоль Захарэўскі, былы пробашч гэтай парафіі. У сваёй гаміліі святар зазначыў, што Маці Божая – наша мама, бо Езус даў Яе кожнаму з нас.
У нас ёсць дзве маці: адна на зямлі, другая – ў небе. Да нябеснай Маці мы звяртаемся ў патрэбах душы і цела, каб Яна заступілася за нас перад сваім Сынам, каб выпрасіла ў Яго для нас патрэбныя ласкі.
Марыя ў сваім зямным жыцці таксама як і мы мела клопаты, перажыванні, таму Яна разумее нас, дапамагае нам праз Сваё заступніцтва перад Езусам. Як кожная маці кідаецца на дапамогу свайму дзіцяці калі ён плача, так і Марыя адклікаецца і заступаецца за нас, дапамагае. Таму мы павінны нястомна прасіць аб дапамозе нашу нябесную Маці.
Пасля св. Эўхарыстыі адбылася працэсія, пасля якой усе заспявалі гімн "Цябе Бога праслаўляем". На заканчэнне ўрачыстасці ўсе верныя атрымалі Божае благаслаўленне.
Маці Божая Чэнстахоўская, маліся за нас!
кл. Раман Вайцяховіч
