Нашы пілігрымы Арцём і Вова ўжо ў Будславе. Аднак, перш чым трапіць да святыні, яны пераадолелі няблізкі шлях пешшу. Аб іх падарожжы вы можаце даведацца з цыкла артыкулаў на нашым інтэрнэт-сайце "Да неба праз Будслаў". А сёння мы прапануем заключны фотарэпартаж з Будслава.
Распачаліся Будслаўскія ўрачыстасці. Пасля св. Імшы для пілігрымаў, мы прайшліся па навакольнай тэрыторыі. Вялікая колькасць палатак-прадстаўніцтваў розных каталіцкіх арганізацый рэкламуюць тут сваю дзейнасць. Карытас, скауты, Легіён Марыі, Кава ў капуцынаў і шмат іншага. Кожны можа знайсці тое, што шукае.
Са СМІ сваю палатку паставіў толькі Каталіцкі Веснік. Прыгожыя і ветлівыя супрацоўніцы, магчымасць падпісацца. Усё як заўсёды мэтанакіравана і проста.
Гандаль. Гэта асобная традыцыйная сфера Будслаўскага фэсту. Тут свае законы. Людзі купляюць, прадаюць. Часам гэта выглядае не па-хрысціянску, часам больш-менш нармальна, але што ні кажы, розныя царкоўныя штукі патрэбныя. Мінімальна, але патрэбныя.
Міліцыя. Вельмі шмат міліцыі. Навокал брамкі з металашукальнікамі, уся тэрыторыя абкружана супрацоўнікамі МУС. У цэлым міліцыянты ветлівыя, усміхаюцца і іх прысутнасць на ўрачыстасці мінімальна заўважальная. Хоць калі прыглядзецца…
Урачыстасці ідуць. Увогуле Будслаўскі фэст – вялікае месца сустрэч. Усе навокал вітаюцца і размаўляюць, абмяркоўваць нейкія рэчы і проста дзеляцца ўражаннямі ад пілігрымак. Вітай, Марыя!
Арцём Ткачук
