У Гродзенскай Вышэйшай Духоўнай Семінарыі з 11 па 13 красавіка праводзіліся рэкалекцыі па распазнанні паклікання для юнакоў. Гэтым разам сюды прыехала каля 50-ці чалавек з розных парафій дыяцэзіі. Навучэнцы старэйшых класаў школы і некалькі студэнтаў прыехалі ў Гродна з Ліды, Суботнікаў, Першамайска, Ваўкавыску, Квасоўкі і іншых мясцовасцяў.
Каардынатарамі сустрэч былі духоўныя кіраўнікі дыяцэзіяльнай семінарыі: кс. Валерый Быкоўскі і кс. Тадэвуш Крыштопік.
Удзельнікі рэкалекцый мелі магчымасць на некалькі дзён акунуцца ў атмасферу семінарыйнага жыцця, пажыць як семінарысты, пазнаёміцца з рэктарам духоўнай установы, выкладчыкамі, клерыкамі.
У праграме былі канферэнцыі і праца ў групах для разважанняў над праслуханым, чытанне і разважанне над Божым Словам, малітва, адарацыя Найсвяцейшага Сакраманта, св. Імша і споведзь.
У цэнтры ўвагі былі асобы рымскіх папаў Яна ХХІІІ і Яна Паўла ІІ, кананізацыя якіх адбудзецца 27 красавіка гэтага года.
Таксама ў суботу вечарам 12 красавіка юнакі ўдзельнічалі ў набажэнстве Крыжовага шляху вуліцамі Гродна разам з іншымі вернікамі, якіх было каля тысячы.
А ў нядзелю 13 красавіка хлопцы ўдзельнічалі ў працэсіі на Пальмовую нядзелю і ўрачыстай св. Імшы з кс. б-пам Аляксандрам Кашкевічам
Марына Белаблоцкая
