31 студзеня салезіянская сям’я ўсяго свету адзначала ўспамін Святога Яна Боско, заснавальніка таварыства Святога Францішка Сальскага. Моладзь з парафіі Святога Міхала Арханёла ў Смаргоні ладзіла святочнае прадстаўленне.
На ўрачыстасць быў запрошаны кс. біскуп Алег Буткевіч, ардынарый Віцебскай дыяцэзіі. У сваёй прамове біскуп засяродзіў увагу парафіян на выхаванні дзяцей у сям’і і важнасць гэтай акалічнасці менавіта ў сучасным свеце. Гэтаму і прысвяціў усё сваё жыццё Святы Ян Боско, які не толькі даў дах над галавой тысячам хлопцаў, але і з’яўляўся для кожнага сапраўдным айцом і настаўнікам, ведаў іх, іх праблемы, клопаты, радасці, быў заўсёды з імі, быў прыкладам. Біскуп таксама звярнуў увагу бацькоў і дзяцей на абавязкі, любоў, узаемную павагу адзін да аднаго. Ён заклікаў бацькоў паглядзець на прыклад Святога Яна Боско, яго падыход да дзяцей і моладзі. А якая мая сям’я? Гэтае пытанне было пакінута для разважання кожнага з прысутных.
Пасля ўрачыстай св. Імшы ўсе прысутныя парафіяне, святары і біскуп былі запрошаны ў Араторый-моладзевы цэнтр на Дон Боско-Шоў. Сустрэў гасцей “італьянскі рэжысёр” разам з сваім асістэнтам, якія прыехалі здымаць кіно пра салезіянскую сям’ю ў Смаргоні. А здымаць сапраўды было што. Крэатыўныя аніматары і кандыдаты з танцамі, радасныя салезіяне-супрацоўнікі з частушкамі, непаўторныя міністранты, поўныя даверу і шчырасці дзеці, артыстычныя ксяндзы-салезіяне і сёстры-салезіянкі – усе маглі праявіць свае таленты і творча паказаць іншым, якая яна, салезіянская сям’я ў Смаргоні.
У канца праграмы біскуп сказаў: “Хто лічыць, што хрысціянства – гэта нешта сумнае, той вельмі моцна памыляецца, і Святы Ян Боско – адзін з першых, хто гэта аправяргае.”
“Будзьце заўсёды радаснымі, д’ябал баіцца радасных,” – Дон Боско заўсёды паўтараў гэтыя словы дзецям і моладзі. Наследуючы яго наказ і прыклад святога жыцця, з упэўненнасцю можна сказаь, што святасць магчыма.
Вераніка Ермак
