II Звычайная Нядзеля. С. Антонія Шэйгерэвіч
Другая Нядзеля звычайнага перыяду літургічнага года зноў ставіць перад намі асобу Яна Хрысціцеля, які, убачыўшы Езуса, сказаў: “Вось Ягня Божае, Той, Хто бярэ на Сябе грахі свету” (Ян 1,29). Гэта вельмі важныя словы, бо мы чуем іх падчас кожнай Святой Эўхарыстыі.
Якія пачуцці выклікаюць у нас гэтыя словы? Здаецца, што мы павінны заўсёды дзякаваць Езусу за тое, што Ён узяў на сябе ўсе грахі свету і мой асабісты грэх. Ён – Сын Божы, які даў мне збаўленне праз тое, што стаў ахвярным Баранкам.
Як радуецца нашае сэрца, калі падчас сакраманту пакаяння чуем словы “….адпускаю табе грахі”. Ці святы Ян Хрысціцель распазнаў у Хрысце Бога-Збаўцу, дзеля якога Ян і хрысціў вадою? Так, бо Езус даў яму ласку пазнання Сябе як Бога. Ці пазнаю я Езуса? Ці прашу Духа Святога, каб асвяціў мяне ласкай пазнання Хрыста і напоўніў сэрца любоўю да Таго, “які бярэ на сябе мой грэх”?
