У цэнтры Гродна, на месцы знішчанага касцёла імя Найсвяцейшай Панны Марыі (Фара Вітаўта) з'явіцца памятная скульптурная кампазіцыя. Пра гэта паведаміў першы намеснік начальніка галоўнага ўпраўлення ідэалагічнай працы, культуры і па справах моладзі Гродзенскага аблвыканкама Аляксандр Вярсоцкі.
Скульптурную кампазіцыю ў выглядзе паўразбуранай аркі з памятным надпісам усталююць у 2014 годзе ў скверы на плошчы Савецкай. Ужо выкананыя эскізы помніка.
Яшчэ адна скульптура як напамін пра згубленых храмы - "Паклонныя крыжы" - з'явіцца ў наступным годзе каля абласнога драмтэатра. Яна будзе нагадваць гродзенцам пра каталіцкі кляштар бэрнардынак ХVII -ХХ стст., які раней знаходзіўся на гэтым месцы.
Акрамя таго, абмяркоўваецца пытанне аб усталяванні мемарыяльных дошак у гонар вядомых дзеячаў, якія жылі ў горадзе ў розны час. Сярод іх – Антоній Тызенгаўз, Жан Эмануэль Жылібер, Давыд Гарадзенскі, Стэфан Баторый, Вітаўт Вялікі, Яўстафій Арлоўскі, Напалеон Орда, Аляксандр Дубко і іншыя.
Гарадзенскія скульптары распрацавалі эскізы іншых помнікаў, якімі прапануюць ушанаваць памяць аб Давыдзе Гарадзенскім, Вітаўце, Стэфане Баторыі. На думку мясцовага скульптара Уладзіміра Качана, скульптуры герояў мінулага маглі б з'явіцца на Савецкай плошчы, ля Барысаглебскай царквы, перад замкамі і стаць асаблівым упрыгожваннем абласнога цэнтра.
Фара Вітаўта была падарваная 52 гады таму - 29 лістапада 1961. Гэта быў самы вялікі каталіцкі храм Гродна . Ён пабудаваны па распараджэнні князя Вітаўта ў 1389 спачатку як драўляны. Пры Стэфане Баторыі, у ХVI стагоддзі, святыня стала каменнай. За сваю гісторыю касцёл не раз гарэў. Пасля пажару 1889 храм аднавілі як праваслаўны Свята- Сафійскі сабор. У 1918 годзе яго зноў вярнулі каталікам, і храм дзейнічаў, як гарнізонны касцёл. Перад знішчэннем будынак выкарыстоўваўся ў якасці склада.
Таццяна Вішнеўская
