25 верасня беларускі партал Тut.by апублікаваў вынікі апытання, якое зладзіў сярод сваіх чытачоў. Рэспандэнты павінны былі адказаць на пытанні, якія прафесіі з’яўляюцца найбольш непрыемнымі. У выніку даследавання, у якім прыняло ўдзел 400 чалавек, аказалася, што праца святара з’яўляецца самай бескарыснай. Вашай увазе прапануем відэаматэрыял каментара кс. Юрыя Жэгарына на вынікі праведзенага апытання.
Здзівіла мяне вельмі інфармацыя з апытання, якую правёў партал тут.бай сярод сваіх чытачоў, дзе многія рэспандэнты выказаліся, што праца святара з’яўляецца самай бескарыснай.
Не буду заглыбляцца ў тэалагічныя разважанні пра сутнасць святарства і даказваць, што апытаныя не маюць рацыі. Скажу толькі тое, што я бачу праз прызму сваёй душпастарскай дзейнасці. Не думаю, што бескарысным можна назваць тое, што як мінімум некалькі чалавек выбралі жыццё і адмовіліся ад самагубства, многія пачалі выходзіць з дэпрэсіі, знайшлі наноў сэнс свайго жыцця, шмат сямейных пар перадумалі разыходзіцца і вырашылі разам гадаваць сваіх дзетак, вялікая колькасць самотных старэйшых людзей дасведчылі радасць, што іх наведаў святар, таму што нават іх родныя і блізкія не знаходзяць часу, каб прыехаць да іх хоць бы раз у год. А колькі ж людзей атрымала ўнутраны, духоўны супакой пасля святой споведзі, колькі ж жанчын выплакалася перад канфесіяналам з-за сваіх мужоў-алкаголікаў?
Я тут не звяртаю ўвагу на духоўны аспект служэння святара, а толькі на сацыяльна-псіхалагічны, які з’яўляецца толькі наступствам духоўнага служэння. Тут не трэба быць нават веруючым чалавекам, каб зразумець гэтую даволі простую праўду. Думаю, у апытанні акурат удзельнічалі неверуючыя людзі, або тыя хто не практыкуе сваю веру. Нажаль такіх людзей у нас вельмі шмат. Каб дарасці да таго, каб называцца вучнем Хрыста, трэба перш за ўсё адкрыцца на праўду, пазбавіцца стэрэатыпаў і шырэй паглядзець на рэчаіснасць, якая нас акружае, стаць перш за ўсё чалавекам.
