28 мая біскуп эмерыт Аляксандр Кашкевіч удзяліў сакрамэнт канфірмацыі ў парафіі благаслаўлёнай Мар’яны Бярнацкай у Гродне (Сапоцкінскі дэканат).
Сакрамэнт быў удзелены на святой Імшы, якую ўзначаліў біскуп. Да канфірмацыі прыступілі маладыя вернікі – у агульнай колькасці 13 чалавек.
На літургіі, якая цэлебравалася ў часовай капліцы, побач з якой будуецца касцёл гэтай маладой парафіі, прысутнічалі шматлікія парафіяне і госці.
Пробашч кс. канонік Юрый Марціновіч прывітаў прысутных і падкрэсліў, што гэты дзень, калі група маладых парафіян, прымаючы сакрамэнт, абавязваецца мужна вызнаваць сваю веру і жыць згодна з ёю, вельмі важны для парафіяльнай супольнасці.
Біскуп у гаміліі заахвоціў канфірмаваных адважна рабіць штодзённы выбар і заўсёды станавіцца на бок праўды і любові – на бок Езуса, Збаўцы.
Іерарх заклікаў маладых людзей адкрыць свае сэрцы, каб прыняць вялікую любоў Бога. Ён дадаў, што, каб гэта не скончылася толькі пачуццямі, трэба адкрыць на Божую праўду таксама свой розум.
У канцы Імшы канфірмаваныя выказалі ўдзячнасць біскупу, свайму душпастыру, катэхетам і ўсім, хто прычыніўся да падрыхтоўкі гэтай урачыстай падзеі.
Біскуп заахвоціў парафіян, асабліва маладых канфірмаваных, штодзённа жыць верай і быць апосталамі ў месцах сваёй вучобы і працы.
Акрамя таго, іерарх благаславіў крыжы, якія будуць для канфірмаваных памятным знакам гэтай падзеі і разам з тым будуць нагадваць пра прабіты падчас укрыжавання бок Езуса Хрыста, з якога праліліся кроў і вада, і пра сакрамэнты Касцёла.
Прэс-служба Гродзенскай дыяцэзіі
Фота: Артур Антушэвіч
