23 красавіка, у сераду актавы Вялікадня, у капліцы Вышэйшай духоўнай семінарыі ў Гродне адбылася святая Імша ў інтэнцыі спачылага Папы Францішка.
На літургіі семінарысты, якія толькі што вярнуліся з велікодных канікул, разам з дапаможным біскупам Пінскай дыяцэзіі Андрэем Зноскам, які праводзіць у семінарыі чарговы цыкл лекцый па кананічным праве, і кіраўніцтвам гэтай навучальнай установы маліліся аб радасці вечнага жыцця для Пантыфіка.
Біскуп заахвоціў студэнтаў і выкладчыкаў маліцца за спачылага Папу, асабліва перад днём яго пахавання, якое адбудзецца ў суботу 26 красавіка.
У гаміліі іерарх засяродзіў увагу на значэнні прысягі асабістай вернасці Пантыфіку і яго вучэнню, якую прыносіць кожны святар перад сваім пасвячэннем.
Прэс-служба Гродзенскай дыяцэзіі
Фота: Станіслаў Бервячонак
