25 сакавіка, ва ўрачыстасць Звеставання Пана, брат Уладзімір Лопух з парафіі св. Ганны ў Варончы (Навагрудскі дэканат) прынёс вечныя манаскія абяцанні ў Ордэне св. Паўла, Першага пустэльніка (паўлінаў).
Як паведамляе сайт Ордэна св. Паўла ў Беларусі, абрад прынясення абяцанняў адбыўся ў капліцы цудадзейнага абраза Маці Божай на Яснай Гары ў Чэнстахове (Польшча).
У агульнай колькасці абяцанні прынеслі сямёра чалавек, якія вучацца ў семінарыі ордэна. Астатнія шасцёра з іх паходзяць з Польшчы, ЗША і Славакіі. Вечныя манаскія абяцанні ў гэтым ордэне па традыцыі прыносяцца ва ўрачыстасць Звеставання Пана.
Святую Імшу, на якой былі прынесены абяцанні, цэлебраваў генеральны настаяцель Ордэна паўлінаў а. Арнольд Храпкоўскі. Звяртаючыся да семінарыстаў, ён пажадаў ім, каб Панна Марыя была для іх Правадніцай на шляху веры.
“Марыя разважала ў сваім сэрцы над Божым словам і з верай прыняла Божы план адносна свайго жыцця. Яна не шукала іншых шляхоў, а верна ішла шляхам веры. Марыя паказала, што надзея – гэта не даверлівы аптымізм, а дар ласкі ў рэчаіснасці жыцця. Таму сёння мы просім Марыю, Маці нашага ордэна, каб вы ішлі па жыцці з верай і надзеяй, якія здзяйсняюцца ў рэалізме жыцця”, – сказаў генеральны настаяцель.
Прэфект семінарыі ордэна а. Павел Пшыгодзкі прызнаўся, што, паколькі ён адказны за святарскую фармацыю маладых братоў, для яго гэтая падзея стала момантам, калі ён напоўніўся бацькоўскім гонарам.
“Для мяне як прэфекта яны з’яўляюцца духоўнымі сынамі, і я вельмі шчаслівы і ганаруся сваімі братамі. За гады служэння сваім братам у семінарыі мне давялося навучыцца іх слухаць і чуць. Каб іх пачуць, я павінен правесці з імі некаторы час, вывучыць мову іх патрэбаў, мову радасці, мову смутку. Агульнай мовай усіх братоў з’яўляецца Евангелле, а найлепшым фарматарам у гісторыі быў Езус Хрыстус”, – адзначыў святар.
