3 красавіка ў касцёле св. Станіслава Косткі ў Ваўкавыску адбылася Эўхарыстыя з нагоды пятай гадавіны смерці кс. каноніка Алега Дуля – былога пробашча гэтай парафіі і дэкана Ваўкавыскага дэканату.
Узначаліў літургію дэкан Ваўкавыскага дэканату кс. канонік Чэслаў Паўлюкевіч, гамілію прамовіў пробашч парафіі кс. Аляксандр Раманоўскі.
Ксёндз Алег узначальваў гэтую парафію на працягу 13 гадоў. У памяці вернікаў ён застаўся як святар, які аддана служыў Богу і людзям, якіх праз сваё ахвярнае служэнне вёў шляхам збаўлення, добры пастыр, неўтаймаваны пілігрым, чалавек малітвы, непахісны ў сваіх пастановах, упарты і адказны ў дасягненні пастаўленых задач, нястомны працаўнік.
Парафіяне спадзяюцца, што міласэрны Бог прыме спачылага святара ў радасць свайго Валадарства.
Прэс-служба Гродзенскай дыяцэзіі
